Пошук


Гродзенская дыяцэзія

Пятніца, 15 снежня 2023
Бэтлеемскае святло міру сустрэлі ў Гродне
15.12.2023 18:03
15 снежня ў катэдральную базыліку святога Францішка Ксавэрыя ў Гродне прыбыў Агонь міру, запалены ад нязгаснай лампады ў базыліцы Нараджэння Пана ў Бэтлееме.
Аплаткавыя сустрэчы духавенства і кансэкраваных асоб Гродзенскай дыяцэзіі пройдуць у Навагрудку і Гродне
15.12.2023 10:40
Напярэдадні свята Божага Нараджэння пройдуць сустрэчы духавенства і кансэкраваных асоб Гродзенскай дыяцэзіі з традыцыйным дзяленнем аплаткай.
Панядзелак, 11 снежня 2023
У Міждыяцэзіяльнай семінарыі ва ўрачыстасць Беззаганнага Зачацця адбыўся дзень засяроджання
11.12.2023 19:02
8 снежня, ва ўрачыстасць Беззаганнага Зачацця Найсвяцейшай Панны Марыі, у супольнасці Вышэйшай духоўнай семінарыі ў Гродне прайшоў дзень засяроджання.
Чацвер, 7 снежня 2023
«Дарога Бога»: у Навагрудку моладзь і дзеці запісалі адвэнтавы гімн
07.12.2023 10:51
На пачатку Адвэнта вернікі парафіі святога Арханёла Міхала ў Навагрудку (Гродзенская дыяцэзія) ўзялі ўдзел ў запісе песні і відэароліка на тэму падрыхтоўкі і радаснага чакання свята Божага Нараджэння.
Аўторак, 5 снежня 2023
У гродзенскай семінарыі зладзілі «Андрэйкі»
05.12.2023 11:39
Перад пачаткам новага літургічнага года ў Вышэйшай духоўнай семінарыі ў Гродне адбыліся «Андрэйкі».
Панядзелак, 4 снежня 2023
Пастырскі ліст біскупа Аляксандра Кашкевіча на першую нядзелю Адвэнту 2023 года
04.12.2023 10:00
Умілаваныя ў Хрысце Пану браты і сёстры, дарагія вернікі нашай дыяцэзіі! Сёння мы адзначаем у літургіі Касцёла першую нядзелю Адвэнту – пачатак новага літургічнага года. Перад намі гадавы цыкл касцёльных урачыстасцяў і святаў, а таксама літургічных перыядаў, якія, змяняючы адно аднаго, нагадваюць нам пра найважнейшыя падзеі гісторыі збаўлення і дазваляюць нанова іх перажыць. Гэта гісторыя любові Бога да чалавека, а найдасканалейшым чынам гэтую любоў нам аб’явіў Езус Хрыстус, Сын Божы, які для нас стаўся чалавекам, каб праз муку, смерць і ўваскрасенне адкупіць усё чалавецтва. Адвэнт, які пачынаецца, – гэта запрашэнне ўвайсці ў настрой суму па Збаўцу і чакання Яго прыйсця. У Старым Запавеце чытаем, як Пан Бог спрадвеку рыхтаваў свой народ да сустрэчы з абяцаным Месіяй. Натхнёныя Богам прарокі нястомна павучалі ізраэлітаў, указвалі на шматлікія выпадкі іх нявернасці і грахі, абвінавачвалі ў жорсткасці сэрца і пагардзе да Божага слова. Адначасова ў пасланнях прарокаў мы можам пачуць заклік апамятацца, распачаць пакаянне і навяртанне, разам з запэўніваннем, што Бог у сваёй бясконцай міласэрнасці акажа грэшнікам прабачэнне і літасць, а Яго ласка пераменіць і адновіць чалавечыя сэрцы. “Завялі мы, як лісце, – вызнае сёння з пакорай прарок Ісая, – а правіны нашыя, як вецер, нясуць нас. І няма нікога, хто заклікаў бы імя Тваё, хто ўстаў бы, каб моцна трымацца за Цябе. […] Але, Пане, Ты – Айцец наш, мы – гліна, а Ты – наш ганчар. І ўсе мы – справа рукі Тваёй” (Iс 64, 5-7). У перыяд Адвэнту Касцёл запрашае нас з такой жа ахвотай, у духу шчырага навяртання, з верай у Божую міласэрнасць і прабачэнне падрыхтаваць сэрцы да сустрэчы з Езусам Хрыстом, які да нас прыходзіць у таямніцы Нараджэння. Хоць Адвэнт не мае характару вузка пакаяннага, традыцыя Касцёла заахвочвае нас адмовіцца ад павярхоўных пацехаў і гучных забаваў, унутрана сцішыцца і звярнуць большую ўвагу на духоўныя справы. Не дазволім, каб гарачка перадсвяточных закупак, прысутныя паўсюль рэкламы ці спакуслівыя прапановы ў крамах заглушылі ў нас жаданне таго, што самае істотнае: больш інтэнсіўнай малітвы, больш уважлівага слухання Божага слова, больш стараннага прыняцця святых сакрамэнтаў. Няхай Адвэнт стане часам глыбокага аднаўлення нашай веры, ажыўлення надзеі, узрастання ў любові да Бога і бліжняга. Двухтысячагадовая традыцыя Касцёла выпрацавала разнастайныя адвэнтавыя практыкі, якія могуць быць карыснымі ў актыўным і свядомым перажыванні гэтага асаблівага часу ласкі. У многіх парафіях арганізоўваюцца рэкалекцыі і дні засяроджання, якія маюць на мэце нагадаць нам важныя праўды, звязаныя з верай, і дапамагчы прыняць адпаведныя адвэнтавыя пастановы, якія палегчаць нам пераадоленне ўласных слабасцяў і грахоў. Ужо цяпер сплануем час так, каб мы маглі ўзяць удзел у гэтых духоўных практыкаваннях, такіх важных і вельмі патрэбных. Па меры магчымасці пастараемся ўдзельнічаць у раратніх святых Імшах, якія традыцыйна цэлебруюцца ў Адвэнт у гонар Маці Божай. Паклапоцімся асабліва аб тым, каб у гэтых Імшах бралі ўдзел дзеці і моладзь. Няхай духоўнае знаходжанне побач з Найсвяцейшай Паннай Марыяй у чаканні прыйсця Сына Божага прынясе ва ўсіх нас плён паглыблення Марыйнай пабожнасці і яшчэ глыбейшага перажывання радасці Божага Нараджэння. Не забудзем прыступіць у перыяд Адвэнту да сакрамэнту паяднання, каб мы маглі сустрэць Хрыста, які прыходзіць, у стане асвячальнай ласкі ў нашых сэрцах. Няхай паяднанне з Панам Богам будзе для нас заахвочваннем да паяднання з бліжнімі шляхам узаемнага прабачэння, даравання правінаў і кампенсавання ўчыненых крыўдаў. Перыяд Адвэнту – гэта таксама час агарнуць асаблівым клопатам тых, хто знаходзіцца ў цяжкай жыццёвай сітуацыі, і аказаць ім сардэчную, бескарыслівую дапамогу. У гэты святы час агледзімся вакол сябе і заўважым людзей бедных, самотных, беспрацоўных, хворых, пажылога ўзросту, тых, якія перажываюць розныя жыццёвыя крызісы і цяжкасці. Пачуем іх нямое маленне аб дапамозе, зацікавімся імі, выкажам ім братэрскае спачуванне, падзелімся тым, што маем, і не пашкадуем для іх хвіліны часу, добрага слова і крупінкі сэрца. Будзем памятаць пра словы Езуса Хрыста: “Сапраўды кажу вам: тое, што вы зрабілі аднаму з гэтых братоў Маіх меншых, вы Мне зрабілі” (Мц 25, 40). Умілаваныя браты і сёстры! Сёлетні перыяд Адвэнту надзвычай кароткі. Ужо праз тры тыдні мы сядзем сем’ямі за вігілійным сталом, падзелімся аплаткай, выкажам адзін аднаму віншаванні і ў чарговы раз у жыцці адчуем выключную радасць, цеплыню, дабро, мір і любоў – штосьці, што мы часта называем магіяй святаў. Спытаемся ў сябе сёння, на пачатку Адвэнту: чаму мы так мала прыкладваем старанняў, каб падобная атмасфера любові, дабрыні і міру панавала ў нашых дамах штодзень, а не толькі ў святы? Можа, варта ўжо цяпер пачаць штосьці змяняць у нашым сямейным жыцці, каб зрабіць яго паўнейшым і прыгажэйшым, больш падобным да найдасканалейшага ўзору, якім з’яўляецца для нас, хрысціян, жыццё Святой Сям’і з Назарэта? Няхай пуцяводным святлом для кожнай сям’і будуць прыгожыя словы Папы Францішка з апостальскай адгартацыі Amoris Laetitia пра любоў у сям’і: “Уцелаўленне Слова ў чалавечай сям’і ў Назарэце, – піша Святы Айцец, – ўзрушвае сваёй навізной гісторыю свету. Мы павінны паглыбіцца ў таямніцу нараджэння Езуса, у „так“ Марыі, сказанае падчас нябеснага звеставання, калі ў Яе ўлонні было зачата Слова; таксама ў „так“ Юзафа, які даў імя Езусу і паклапаціўся пра Марыю; у радасць пастухоў пры яслях; у пакланенне трох Мудрацоў; у таямніцу ўдзелу Езуса ў пакутах свайго выгнанага, пераследаванага і прыніжанага народу. […] Далей трэба паглыбіцца ў перыяд трыццаці доўгіх гадоў, калі Езус зарабляў на сваё жыццё, працуючы сваімі рукамі, узносячы малітвы і захоўваючы рэлігійныя традыцыі свайго народу, выхоўваючыся ў веры сваіх айцоў, клапоцячыся, каб яна дала плён ў таямніцы Валадарства. Гэта таямніца Божага Нараджэння і таямніца Назарэта, […] з яе таксама чэрпаюць прыклады хрысціянскія сем’і, каб аднавіць сваю надзею і радасць. Запавет любові і вернасці, якім жыве Святая Сям’я з Назарэта, пралівае святло на прынцып, які надае форму кожнай сям’і і дазваляе ёй лепш спраўляцца са зменлівасцю жыцця і гісторыі. На гэтым падмурку кожная сям’я таксама ў сваёй слабасці можа стаць святлом у змроку свету. […] Няхай Назарэт сам нагадае, чым ёсць сям’я, чым ёсць еднасць любові, яе суровая і простая прыгажосць, яе святы і непарушны характар” (AL, 65-66). З усяго сэрца жадаю кожнаму з вас, дарагія браты і сёстры, цудоўнага і глыбокага, поўнага сэнсу і шчодрага на духоўныя плёны перажывання Адвэнту. Няхай гэты святы час будзе ўзбагачаны асабістай малітвай, прыняццем святых сакрамэнтаў і ўважлівым слуханнем Божага слова. Няхай не будзе ў вас недахопу ва ўнутранай цішыні і засяроджанасці, якія дазволяць пачуць у сэрцы далікатны і поўны любові Божы голас. Памятаю пра вас, дарагія вернікі дыяцэзіі, у маіх малітвах, даручаю ваш шлях адвэнтавага чування клапатлівай апецы Беззаганнай Панны Марыі і на плённую падрыхтоўку да святаў Божага Нараджэння ўсіх з усяго сэрца благаслаўляю. Aляксандр Кашкевіч Біскуп Гродзенскі Гродна, 27.11.2023 г.
Пятніца, 1 снежня 2023
Фотафакт: у Гродне каталіцкі святар узяў удзел ва ўрачыстасцях з нагоды гадавін лютэранскай супольнасці
01.12.2023 10:37
29 лістапада ў Гродне адбылося ўрачыстае мерапрыемства ў гонар 230-годдзя з часу заснавання евангелічна-лютэранскай супольнасці і 30-годдзя яе сучаснай гісторыіі.
У Гродне можна далучыцца да супольнай малітвы за сем’і
01.12.2023 09:43
У шэрагу гродзенскіх парафій рэгулярна праходзіць малітва ў абарону жыцця і сямейных каштоўнасцяў.
Чацвер, 30 лістапада 2023
«Што рабіць, калі дзіця крадзе?» Пра гэтую праблему і яе вырашэнне — у новым нумары газеты «Слова Жыцця» (+ PDF)
30.11.2023 11:30
У чарговым нумары газеты Гродзенскай дыяцэзіі «Слова жыцця» (№ 21 (619) 2023) узгадваюць пра жыццё і служэнне ксяндза салезіяніна Здзіслава Вэдэра, а таксама апавядаюць бацькам пра тое, што рабіць, калі дзіця крадзе.
Серада, 29 лістапада 2023
У Лідзе 25-ю гадавіну адзначыла парафія, заснаваная біскупам Кашкевічам
29.11.2023 12:47
25 лістапада ў касцёле святога Юзафа Каласанса ў Лідзе 25-гадовы юбілей адзначыла парафія Унебаўзяцця Найсвяцейшай Панны Марыі.
Панядзелак, 27 лістапада 2023
Фотафакт: на ўрачыстасць Хрыста Валадара cусвету ў парафію ў Іўі прыехалі семінарысты з Гродна
27.11.2023 13:18
Ва ўрачыстасць Хрыста Валадара cусвету, якая сёлета адзначалася 26 лістапада, у Касцёле на Беларусі традыцыйна адбываецца збор ахвяраванняў на Міждыяцэзіяльную вышэйшую духоўную семінарыю ў Гродне.
Чацвер, 23 лістапада 2023
З удзелам біскупа Яшэўскага ў Лодзі адбылося пахаванне ксяндза Здзіслава Вэдэра SDB, шматгадовага пробашча ў Смаргоні
23.11.2023 10:44
21 лістапада ў Лодзі (Польшча) адбылося пахаванне ксяндза каноніка Здзіслава Вэдэра SDB, які шмат гадоў нёс душпастырскае служэнне ў Беларусі. Заслужаны святар, які быў найстарэйшым салезіянінам у нашай краіне, адышоў у вечнасць 11 лістапада на 87-м годзе жыцця і 61-м святарства.
Серада, 22 лістапада 2023
На малой радзіме Слугі Божага біскупа Зыгмунта Лазінскага ўсталявалі крыж і мемарыяльны знак у яго памяць
22.11.2023 10:16
У аўторак 21 лістапада ў вёсцы Барацін Карэліцкага раёна (Гродзенская дыяцэзія) быў благаслаўлёны крыж і памятны знак у гонар славутага земляка — Слугі Божага біскупа Зыгмунта Лазінскага.
У Гродне адбыўся дзень засяроджання для духавенства і кансэкраваных асоб Гродзенскай дыяцэзіі
22.11.2023 09:17
20 лістапада ў святынях Гродна прайшоў дзень засяроджання для духавенства і законных сясцёр, якія служаць на тэрыторыі Гродзенскай дыяцэзіі.
Панядзелак, 20 лістапада 2023
У гродзенскай катэдры адзначылі ўрачыстасць галоўнай Апякункі дыяцэзіі
20.11.2023 09:38
16 лістапада, ва ўрачыстасць Найсвяцейшай Панны Марыі, Маці Міласэрнасці (Вастрабрамскай), у катэдральнай базыліцы святога Францішка Ксавэрыя адбылася святая Імша, цэлебрыцыю якой узначаліў біскуп Гродзенскі Аляксандр Кашкевіч.
Пятніца, 17 лістапада 2023
Дзяўчат і жанчын у лістападзе запрашаюць у Гудагай на «Дні цішыні»
17.11.2023 14:00
Сёстры Кармэліткі Дзіцяткі Езуса запрашаюць дзяўчат і жанчын на «Дні цішыні», якія пройдуць у Гудагаі (Гродзенская дыяцэзія, Астравецкі дэканат) з 24 па 26 лістапада.
У Смаргоні з удзелам біскупаў маліліся за памерлага ксяндза Здзіслава Вэдэра SDB, шматгадовага душпастыра мясцовай парафіі
17.11.2023 10:30
13 лістапада ў касцёле святога Міхала Арханёла ў Смаргоні (Гродзенская дыяцэзія) цэлебравалася святая Імша ў інтэнцыі памерлага ксяндза каноніка Здзіслава Вэдэра SDB.
Серада, 15 лістапада 2023
За спачылася ксяндза Здзіслава Вэдэра SDB малілася духавенства Гродзенскай дыяцэзіі ў Ашмянах
15.11.2023 11:59
14 лістапада ў парафіі святога Міхала Арханёла ў Ашмянах адбыўся дзень засяроджання для духавенства і асоб кансэкраванага жыцця, якія служаць у Гродзенскай дыяцэзіі.
Аўторак, 14 лістапада 2023
У Сапоцкіне з удзелам біскупа Кашкевіча адзначылі 400-годдзе мучаніцкай смерці святога Язафата Кунцэвіча
14.11.2023 13:13
12 лістапада ў касцёле Унебаўзяцця Найсвяцейшай Панны Марыі і святога Язафата ў Сапоцкіне (Гродзенская дыяцэзія) адбылася адпустовая ўрачыстасць у гонар нябеснага апекуна мясцовай парафіі.
Панядзелак, 13 лістапада 2023
«Слова жыцця»: з нядзелі даступны новы нумар
13.11.2023 09:22
У чарговым нумары газеты Гродзенскай дыяцэзіі «Слова жыцця» (№ 20 (618) 2023) апавядаецца пра тое, як у горадзе над Нёманам дапамагаюць патрабуючым, а таксама змешчаны шэраг іншых цікавых матэрыялаў.
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа