12 верасня, ў Санктуарыі святой Ганны ў Смардзэвіцах (Польшча), беларус брат Максім Фесік даў першыя манаскія абяцанні ў Ордэне Братоў Меншых Канвентуальных (францішканаў).
Брат Максім родам з Бабруйска і ўжо два гады знаходзіцца на манаскай фармацыі ў францішканаў. У хуткім часе брат Максім распачне вучобу ў Вышэйшай духоўнай семінарыі братоў францішканаў у Лодзі-Лагеўніках.
У гэты ж дзень пастулант Аляксандр Каляга абрадам аблучынаў распачаў час кананічнага навіцыяту, які з’яўляецца часам прыгатавання да манаскіх шлюбаў.
Навіцый атрымоўвае хабіт і шнур без вузлоў, толькі пры складанні манаскіх абяцанняў на ім завязваюцца тры вузлы, якія сімвалізуюць тры евангельскія рады: чыстасць, паслухмянасць і беднасць.
Брат Аляксандр родам з Глыбокага. Навіцыят братоў францішканаў адбываецца ў вёсцы Смардзэвіцах пад Тамашовам Мазавецкім (Польшча).
Старэйшыя субраты жадаюць маладым францішканам радасці, моцы Духа Святога і заступніцтва святога Францішка з Асізі на дарозе да святасці.
