4 верасня, ва ўспамін благаслаўлёных навагрудскіх назарэтанак-мучаніц, у гродзенскім рэктаральным касцёле Звеставання Найсвяцейшай Панне Марыі прайшла цырымонія ўстанаўлення новага кіраўніцтва Беларускай правінцыі Кангрэгацыі Сясцёр Найсвяцейшай Сям’і з Назарэта.
Новай правінцыйнай настаяцельніцай стала сястра Антонія Шайгярэвіч, у склад новага кіраўніцтва ўвайшлі сёстры Агата Смольская, Ёзэфа Канаева і Мірыям Пэцнік.
Цырымоніі папярэднічала набажэнства, на якім дзякавалі Богу за шасцігадовы перыяд дзейнасці ранейшага кіраўніцтва (у яго ўваходзілі сястра Філатэя Ціхановіч, якая была правінцыйнай настаяцельніцай, сёстры Лаўра Шукяловіч, Клара Волчак і Віргінія Хацян), за добрыя падзеі і цяжкасці, якія былі ў гэты час, і за вернасць беларускіх назарэтанак харызме сваёй супольнасці.
У ходзе абраду ўстанаўлення новага кіраўніцтва сёстры далі абяцанне вернасці сваёй місіі, сястра Філатэя перадала сястры Антоніі знакі адказнасці правінцыйнай настаяцельніцы — хлеб (сімвал клопату аб сёстрах і супольнасці) і пячатку правінцыі.
Таксама адбылася літургія знакаў, якая выражае адзінства правінцыі, тое, што назарэтанкі згодна з евангельскім вучэннем даручаюць сябе Богу і адкрываюцца на Яго волю, і тое, што іх служэнне — працяг ахвярнай місіі навагрудскіх мучаніц з мэтай устанаўлення Божага Валадарства на зямлі. Сёстры памаліліся за новае кіраўніцтва і аб дарах Духа Святога для яго, паабяцалі ўзаемную падтрымку.
Пасля цырымоніі адбылася святая Імша, якую цэлебраваў у інтэнцыі ранейшага і новага кіраўніцтва правінцыі назарэтанак рэктар касцёла Звеставання Найсвяцейшай Панне Марыі ксёндз канонік Антоні Грэмза.
