27 кастрычніка Папа Леў XIV прыбудзе ў Асізі, каб завяршыць міжнародную сустрэчу «Бяззбройны і абяззбройваючы мір», якую арганізоўвае Супольнасць святога Эгідзія.
Падзея прымеркавана да 40-годдзя першага гістарычнага Дня малітвы за мір прадстаўнікоў сусветных рэлігій, які ў 1986 годзе склікаў Ян Павел II. Пра гэта паведаміў кіраўнік Супольнасці Марка Імпальяца падчас прэс-канферэнцыі. На трохдзённым форуме міжрэлігійнага дыялогу 25-27 кастрычніка чакаюць каля 5 тысяч удзельнікаў.
Паводле Імпальяца, Папа прыедзе ў Асізі 27 кастрычніка ў другой палове дня і асабіста павітаецца з некаторымі ўдзельнікамі сустрэчы. Затым Леў XIV узначаліць малітву хрысціян у Ніжняй базыліцы Асізі разам з Патрыярхам Канстанцінопальскім Барталамеем І і іншымі хрысціянскімі лідарамі.
У той самы час у 13 розных месцах Асізі пройдзе малітва за мір: прадстаўнікі кожнай рэлігіі будуць маліцца асобна, паводле сваёй традыцыі.
Пасля агульнай хрысціянскай малітвы прагучаць дзве медытацыі – Папы Льва XIV і Патрыярха Барталамея І. Затым на пляцоўцы перад Ніжняй базылікай разам са Святым Айцом збяруцца 80 рэлігійных лідараў, і пачнецца агульная сустрэча. Падчас яе запланаваны зварот Пантыфіка.
