У чацвер 7 мая ў парафіі Адведзінаў Найсвяцейшай Панны Марыі ў Альковічах (Мінска-Магілёўская архідыяцэзія, Вілейскі дэканат) пройдзе святая Імша за спачылага ксяндза інфулата Станіслава Кучынскага з нагоды 30-годдзя з дня яго смерці.
Жалобную Імшу ўзначаліць арцыбіскуп Юзаф Станеўскі, Мітрапаліт Мінска-Магілёўскі, Старшыня ККББ.
Пачатак у 12.00.
Перад Імшой у 11.30 будзе прачытаны даклад пра жыццё і дзейнасць святара.
Даведка
Ксёндз Станіслаў Кучынскі нарадзіўся ў 1914 годзе ў фальварку Марыямпаль, які належаў парафіі Альковічы. Пасля вучобы ў вілейскай гімназіі паступіў у Вышэйшую духоўную семінарыю ў Вільні. У 1939 годзе атрымаў святарскае пасвячэнне і быў скіраваны на душпастырскую працу ў якасці вікарыя ў парафію ў Свіры (сёння гэта Мядзельскі дэканат). Падчас Другой сусветнай вайны ён быў пераведзены ў Шэметава для дапамогі пажылому святару. Пасля смерці апошняга ў 1943 годзе стаў пробашчам парафіі і нёс служэнне на працягу доўгіх 47 гадоў. У 1973 годзе прызначаны генеральным вікарыем усходняй часткі Віленскай архідыяцэзіі, а ў 1979 атрымаў ганаровы тытул прэлата.
У 1990 годзе прыняў запрашэнне тагачаснага адміністратара Мінскай дыяцэзіі для католікаў лацінскага абраду ў Беларусі біскупа Тадэвуша Кандрусевіча і стаў першым рэктарам новастворанай Гродзенскай вышэйшай духоўнай семінарыі. Затым выконваў функцыю генеральнага вікарыя Гродзенскай дыяцэзіі, спаведніка семінарыстаў і мадэратара некалькіх касцёльных рухаў. За вернае нястомнае служэнне Касцёлу ў 1991 годзе атрымаў тытул папскага протанатарыя (інфулата).
Святар памёр 8 мая 1996 года ў Гродне. У сваім тэстамэнце ён выразіў жаданне быць пахаваным у сваёй роднай парафіі ў Альковічах, дзе ён быў ахрышчаны і прыняў першую Святую Камунію. Пахаванне ксяндза Кучынскага адбылося 10 мая. Яго цела было перавезена з Гродна ў Альковічы і спачыла на касцёльнай тэрыторыі за апсідай касцёла.
