Казальба, што каля Неапаля, у апошнія дні стала месцам пілігрымавання. На статуі Падрэ Піо перад святыняй выявілі «крывавую слязу». Па просьбе біскупа спецыяльная камісія расследуе гэтую справу. Італьянскія медыя актыўна абмяркоўваюць верагодную звышнатуральную з'яву, якая адбылася ў парафіі Маці Божай Міласцівай у Казальбе. Гэта невялікая вёска з насельніцтвам 400 чалавек, размешчаная ў камуне Мачэрата ў рэгіёне Кампанія, якая належыць да архідыяцэзіі Капуі.
Адкрыццё
Усё пачалося 18 красавіка, калі вернік паведаміў пробашчу, што «на шчацэ Падрэ Піо ёсць пляма». Статуя святога ў чалавечы рост стаіць на каменным падмурку ў крытай капліцы перад святыняй. Паколькі да вячэрняй Імшы яшчэ было крыху часу, айцец Джыралама Капуана ўзяў мятлу і паспрабаваў ачысціць твар святога, але пляма засталася. Святар вырашыў разабрацца з гэтым заўтра. Раніцай ён узяў лесвіцу і беспаспяхова паспрабаваў выдаліць пляму з левай шчакі статуі тканінай. Аднак, прыгледзеўшыся больш уважліва, айцец Джыралама ўсвядоміў, што гэта была не пляма, а «крывавая сляза».
Пасля гэтага адкрыцця пробашч літаральна пакадрава прагледзеў запіс з камеры, накіраванай на статую святога з П'етрэльчыны, каб пераканацца, ці не было нейкіх маніпуляцый. Для ўпэўненасці ён прагледзеў відэазапісы за цэлы месяц.
Айцец Капуана выявіў, што ў папярэднія дні многія людзі падыходзілі да статуі, каб дакрануцца да ног святога, але ніхто не дакранаўся да яго твару. 20 красавіка 2026 года пробашч паведаміў пра здарэнне арцыбіскупу Капуі П'етра Ланьезэ.
Расследаванне працягваецца
Святар захоўваў канфідэнцыяльнасць і не разгалошваў навіну аб магчымым «цудзе» Падрэ Піо. Спецыяльная камісія з курыі наведала парафію разам з арцыбіскупам. Пасля першапачатковага агляду камісія вырашыла зняць статую і аддаць «слязу» спецыялістам для далейшага даследавання.
Расследаванне праводзіцца ў адпаведнасці з новым дакументам Дыкастэрыі веравучэння аб распазнаванні верагодных звышнатуральных з'яў, які ўступіў у сілу 17 мая 2024 года.
У гэтым дакуменце зазначана, што ні біскуп, ні Святы Пасад не будуць вызначаць звышнатуральнасць пэўнай з'явы, а абмяжуюцца дазволам і садзейнічаннем пабожнасці і пілігрымкам.
Для гэтага патрабуецца nihil obstat (лац. «нішто не пярэчыць») Дыкастэрыі, якая не выказвае ўпэўненасці ў сапраўднай звышнатуральнасці з'явы, але прызнае прыкметы дзеяння Духа Святога. А мясцовага біскупа адпаведна заахвочваюць вызначыць пастырскую вартасць і падтрымліваць распаўсюджванне пэўнай з'явы.
Малюсенькая Казальба
Пробашч чакае вынікаў працы камісіі, аднак не пазбягае абмеркаванняў гэтага пытання з вернікамі і тымі, хто цяпер наведвае парафію, прыбываючы са шматлікіх італьянскіх гарадоў. Ён таксама не ўстрымліваецца ад каментароў для СМІ, якія шырока паведамляюць аб «меркаваным цудзе Падрэ Піо» У інтэрв'ю для «Il Messaggero» а. Капуана патлумачыў, чаму, на яго думку, гэта адбылося ў малюсенькай і нікому не вядомай Казальбе. «Увогуле Бог аддае перавагу невялікім месцам. Я не хачу рабіць зняважлівых параўнанняў, але Фаціма, Люрд і Меджугор'е былі месцамі ў цэлым няважнымі для гісторыі чалавецтва», — кажа святар.
Ён адзначае, што парафія вельмі адданая Падрэ Піо, які заўсёды казаў, што хоча, каб яго памяталі толькі як «святара, які моліцца».
«Я не здзіўлюся, калі ён захацеў дапамагчы нам вярнуцца да малітвы ў часы, калі людзі ўсё больш забываюць пра яе»,
— падкрэслівае пробашч.
У інтэрв'ю італьянскаму тэлеканалу RAI UNO ён прызнаецца, што Казальба можа быць маленькай школай малітвы. «Круглы год, акрамя святаў, я кожны вечар сустракаюся з вернікамі на малітве ў іх дамах, і гэта адлюстроўваецца ў жыцці сакрамэнтамі», — кажа айцец Капуана.
«Я веру, што гэта Божы знак»
Парафіяне сведчаць пра велізарную адданасць іх пробашча, які выходзіць насустрач людзям, як толькі можа. У марыйны месяц май (але не толькі) айцец пераносіць малітву Ружанца і Імшы на вуліцы, служачы пры дзвярах асобных дамоў па календары, размешчаным на парафіяльнай дошцы аб'яваў.
Святар падкрэслівае, што «слёзы ў гісторыі Касцёла заўсёды з'яўляюцца запрашэннем да пакаяння і малітвы, а ў свеце пастаянных войнаў мы бачым, што такое свет без Бога».
Нягледзячы на асцярожнасць у гэтай сітуацыі, айцец Джыралама верыць у глыбокае значэнне «слязы Падрэ Піо»:
«Я веру, што гэта знак Божы, таму што бачыў запісы з камер назірання, — а таксама ўлічваючы ўсё, што мы робім; тое, чым з'яўляецца маё жыццё і пабожнасць, бо гэта адпавядае майму шляху веры. Вядома, эксперты праясняць гэтае пытанне», — кажа ён. У той жа час «таямніца слязы» абуджае цікаўнасць і заахвочвае да малітвы.
Выказваліся здагадкі, што «крывавая сляза» можа аказацца іржой, якая ўелася ў шчаку статуі, сцякаючы з металічнага накрыцця над капліцай. Згодна з касцёльнымі стандартамі, праца камісіі, якая расследуе гэтую справу, можа доўжыцца нават год.
