Напярэдадні Дня святога Валянціна прэзентавалі мабільны дадатак, які змяшчае сабраныя святым Карла Акуцісам звесткі пра Эўхарыстычныя цуды і прапануе магчымасць анлайн-адарацыі.
Гэтая лічбавая платформа была створана санктуарыем святога Карла Акуціса ў Малверне (ЗША) пры актыўным удзеле маці святога, Антоніі Акуціс.
Дадатак змяшчае не толькі апісанні больш чым 130 Эўхарыстычных цудаў, якія юнак паспеў задакументаваць пры жыцці, але і інтэрактыўную праграму «Жыві як Карла». Яна заклікана натхніць карыстальнікаў, асабліва моладзь, ісці шляхам святасці ў штодзённым жыцці.
Новы лічбавы інструмент дазваляе наведаць капліцы ў розных кутках свету
Адной з ключавых функцый праграмы з’яўляецца раздзел для малітвы перад Найсвяцейшым Сакрамэнтам у рэжыме рэальнага часу. Арцыбіскуп Філадэльфіі Нэльсан Перэс адзначыў, што такі рэсурс стане выдатным дапаможнікам для бацькоў і настаўнікаў у размовах з дзецьмі пра каталіцкую веру. Дадатак дапамагае ўбачыць у Эўхарыстыі не проста абрад, а «найвялікшую гісторыю любові» паміж Богам і чалавекам.
Праект стаў сучасным працягам місіі «кібер-апостала» Эўхарыстыі
Выканаўчы дырэктар санктуарыя Мэры Бі Даміка падкрэсліла, што выкарыстанне тэхналогій для праслаўлення Бога было сутнасцю жыцця Карла Акуціса.
Сімвалічна, што запуск адбыўся ў Дзень святога Валянціна, які быў біскупам у рэгіёне Умбрыя, непадалёк ад Асізі, дзе цяпер спачывае святы Карла.
Мабільны дадатак даступны для карыстальнікаў iOS і Android і з’яўляецца бясплатным.
