24 кастрычніка 2026 года стане памятнай датай для ўсіх прысутных на ўрачыстай святой Імшы святароў, кансэкраваных асоб і вернікаў архідыяцэзіі, якая адбылася ў магілёўскай конкатэдры Унебаўзяцця Найсвяцейшай Панны Марыі з нагоды пятай гадавіны служэння арцыбіскупа Юзафа Станеўскага ў якасці Мітрапаліта Мінска-Магілёўскага: яны сталі сведкамі прызначэння новых канонікаў Магілёўскага калегіяльнага капітула Маці Божай Бялыніцкай і святога Антонія Падуанскага.
Гэтая падзея стала важнай не толькі для святароў, прызначаных канонікамі, але і для ўсёй супольнасці архідыяцэзіі. Прыняўшы новае служэнне, яны ўзялі на сябе адказнасць перад Касцёлам і вернікамі.
Нагадаем, што 6 верасня ў Бялынічах адбылася ўрачыстая Эўхарыстыя, прысвечаная 265‑годдзю каранацыі абраза Маці Божай Бялыніцкай, падчас якой Мітрапаліт Мінска‑Магілёўскі арцыбіскуп Юзаф Станеўскі абвясціў важную падзею ў жыцці архідыяцэзіі: заснаванне Магілёўскага калегіяльнага капітула пры конкатэдры Унебаўзяцця Найсвяцейшай Панны Марыі.
Апекунамі новаўтворанага капітула з’яўляюцца: Найсвяцейшая Панна Марыя Бялыніцкая, Каралева Беларусі, якая з XVI стагоддзя апякуецца жыхарамі Магілёўшчыны; і святы Антоній Падуанскі, які з XVI стагоддзя з’яўляецца апекуном горада Магілёва. Гэтыя два вялікія апекуны з'яўляюцца духоўнымі слупамі капітула, яго абаронай і натхненнем у служэнні Богу і людзям.
Арцыбіскуп Станеўскі абвясціў тады, што біскуп Аляксандр Яшэўскі SDB прызначаецца грэміяльным канонікам Магілёўскага калегіяльнага капітула і ўступае ў служэнне дэкана капітула.
Для першых канонікаў новастворанага Магілёўскага калегіяльнага капітула гэта вялікі гонар і пачэсная місія, якая ўскладае на іх асаблівую адказнасць. Сваім служэннем, удзелам у літургіі і асабістым прыкладам яны пакліканыя спрыяць умацаванню веры і надзеі, будаваць еднасць і сведчыць пра хрысціянскую любоў.
Грэміяльныя канонікі:
- Біскуп Аляксандр Яшэўскі SDB — дэкан.
- Ксёндз канонік Юзаф Сярпейка — кусташ.
- Ксёндз канонік Павел Сідарэнка — пенітэнцыярый.
- Ксёндз канонік Уладзімір Русак — цырымоніймайстар.
- Ксёндз канонік Дзмітрый Чупрын — сакратар.
- Ксёндз канонік Генрых Кучынскі.
- Ксёндз канонік Віталій Стрыга.
- Ксёндз канонік Павел Шылак.
Ганаровыя канонікі:
- Ксёндз канонік Павел Эйсмант.
- Ксёндз канонік Казімір Шыдэлка SDB.
«Магілёўская архідыяцэзія мела свой Капітул, і сёння распачынаецца новы этап яго гісторыі. Гэта гісторыя ў новых абставінах і з новымі канонікамі, але з нязменнай мэтай: Богу — хвала, Марыі — давер, Касцёлу — вернасць. Няхай іх служэнне стане сведчаннем вернасці Богу, Касцёлу і народу, а таксама дапаможа ўмацоўваць веру, будаваць еднасць і паглыбляць пашану да Маці Божай Бялыніцкай і святога Антонія — апекуноў Магілёўскага краю»— пажадаў Мітрапаліт новым канонікам.
