У нядзелю 22 кастрычніка беларусы каталіцкага веравызнання, якія жывуць у маскоўскім рэгіёне Расіі, сабраліся ў капліцы кляштара айцоў францішканаў на супольную малітву на роднай мове ў інтэнцыі міру.
Перад Эўхарыстыяй, якую цэлебраваў душпастыр супольнасці беларусаў-католікаў Масквы і Падмаскоўя айцец Пётр Карнелюк OFMConv, адбылася адарацыя Найсвяцейшага Сакрамэнту. Падчас набажэнства сабраныя маліліся за супакой на Блізкім Усходзе і ва Украіне. Таксама прагучаў заклік далучыцца 27 кастрычніка да дня посту, малітвы і пакаяння, які абвясціў Папа Францішак ў інтэнцыі міру на Святой Зямлі.
У прамоўленай гаміліі айцец Пётр засяродзіўся на нядзельным урыўку з Евангелля паводле Мацвея, у якім ідзе гаворка пра тое, як фарысеі правакавалі Езуса пытаннем, ці належыць плаціць падатак цэзару.
«Канечне, усе мы, грамадзяне, павінны плаціць падаткі, аплочваць праезд у транспарце», — зазначыў святар, прыгадаўшы, як у часы яго юнацтва ў аўтобусах і тралейбусах нярэдка можна было ўбачыць надпіс: «Сумленне — найлепшы картралёр».
«Так, людзі абавязаны плаціць падаткі і адказна ўдзельнічаць у барацьбе за праўду і грамадскую справядлівасць. Адначасова мы належым Богу. На манеце — выява цэзара <…>, а ў душы мы маем вобраз Бога: мы створаныя паводле Яго падабенства і таму павінны аддаваць Богу пашану. Толькі тады мы атрымаем узамен радасць і шчасце еднасці з Ім», — падкрэсліў айцец Пётр. Ён таксама нагадаў, што 22 кастрычніка Касцёл успамінае святога Яна Паўла ІІ, які на пачатку свайго пантыфікату казаў усім людзям: «Не бойцеся!»
«Не бойцеся і вы аддаваць належнае Богу. Аддайце Хрысту першае месца ў жыцці, і ўсё астатняе самое зойме адпаведныя месцы», — заахвоціў вернікаў айцец Пётр Карнелюк.
Пасля заканчэння набажэнства у францішканскім Культурным цэнтры адбылася душпастырская сустрэча.
