7 чэрвеня 2020 года ў Варшаве (Польшча) адбудзецца ўрачыстая беатыфікацыя кардынала Стэфана Вышынскага, якога ў суседняй краіне называюць «Прымасам тысячагоддзя».
Як са спасылкай на Каталіцкае інфармацыйнае агенцтва КАІ паведамляе партал Deon.pl, урачыстая беатыфікацыя, цэлебрацыю якой узначаліць прэфект ватыканскай Кангрэгацыі па справах Кананізацыі, пройдзе ў межах чарговага Дня падзякі.
Як адзначае арцыбіскуп Мітрапаліт Варшаўскі кардынал Казімір Ныч, «гэта будзе цудоўная нагода і прычына для падзякі».
Іерарх лічыць, што перад усім Касцёлам у Польшчы цяпер стаіць задача добра падрыхтавацца да гэтай важнай падзеі. Між іншым, неабходна лепш пазнаёміць вернікаў і шырокую грамадскасць з асобаю і духоўнай спадчынай кардынала Вышынскага.
З гэтаю мэтаю ў Варшаўскай архідыяцэзіі пачаў дзейнічаць афіцыйны інтэрнэт-сэрвіс, прысвечаны асобе Прымаса Стэфана Вышынскага www.prymaswyszynski.pl.
Як падкрэсліў кардынал Ныч, гэты сэрвіс мае інфармацыйнае і фармацыйнае прызначэнне.
