У свята Божай Міласэрнасці, якое святкуецца ў Другую Велікодную нядзелю, што сёлета прыпала на 7 красавіка, у касцёле Божай Міласэрнасці ў Асіповічах (Мінска-Магілёўская архідыяцэзія, Бабруйскі дэканат) адбылася адпустовая ўрачыстасць.
У гэты дзень парафіяне таксама святкавалі 11-ю гадавіну касэкрацыі сваёй святыні. Пробашч парафіі айцец Натанэль Вайтала OFM сардэчна прывітаў гасцей з Бабруйска, Мінска, Слуцка, Старых Дарог. Цэлебрацыю святой Імшы ўзначаліў Генеральны вікарый Мінска-Магілёўскай архідыяцэзіі біскуп Аляксандр Яшэўскі SDB. Ва ўрачыстасці ўдзельнічаў таксама айцец Аляксей Рамановіч OFM са Слуцка.
У прамоўленай гаміліі біскуп падкрэсліў, што найвялікшым дарам Божай Міласэрнасці з’яўляецца Эўхарыстыя.
Напачатку іерарх звярнуў увагу на Божы культ у Старым Запавеце, калі найкаштоўнейшай святыняй на працягу многіх стагоддзяў быў Каўчэг Запавету.
«Мы, католікі, маем бясконца большы скарб — Найсвяцейшы Сакрамэнт Цела і Крыві нашага Пана Езуса Хрыста, — адзначыў біскуп. — Чым для юдэяў быў Каўчэг Запавету, тым для католікаў з’яўляецца табэрнакулюм. У Каўчэгу былі толькі памяткі Божай ласкі, а ў табернакулюме знаходзіцца крыніца ўсялякай ласкі і Божай Міласэрнасці. На Апошняй Вячэры Езус даў Касцёлу скарб са скарбаў — самога сябе, сваю Боскасць і сваю чалавечую прыроду як Сын Нябеснага Айца і як Сын Дзевы Марыі. Аддаў не на кароткі час, але назаўсёды», — падкрэсліў біскуп Яшэўскі, заўважыўшы, што Касцёл цешыцца гэтым скарбам, бо бачыць у ім крыніцу ўласнай сутнасці.
«Кошт гэтага скарбу перавышае ўсё, што чалавек можа сабе ўявіць. Усе зямныя скарбы вычэрпваюцца, але Найсвяцейшы Сакрамэнт падобны да бяздоннага мора: яго немагчыма вычарпаць» — дадаў пастыр. Гаворачы пра значэнне Найсвяцейшага Сакрамэнту, біскуп Яшэўскі адзначыў, што гэта крыніца, з якой выцякае глыбокая рака благаслаўленняў і Божай Міласэрнасці.
«Эўхарыстыя — гэта задатак нашага вечнага збаўлення. Таму і сёння Касцёл будуе цудоўныя святыні, такія, як у Асіповічах, бо святыня павінна быць домам Валадара ўсіх валадароў; таму ўпрыгожвае алтары, табэрнакулюмы і манстранцыі каштоўнымі матэрыяламі, складае ўзнёслыя гімны і песні праслаўлення Найсвяцейшага Сакрамэнту, нясе Яго ва ўрачыстых працэсіях. Таму Касцёл кліча нас усіх, запрашае і заахвочвае з павагай прыступаць да Стала Пана і на ўласным вопыце спазнаць, наколькі гэта вялікі скарб, наколькі цудоўныя яго дзеянні!» — падкрэсліў біскуп.
Ён нагадаў, што шчаслівымі былі пастухі, якія убачылі Езуса сваімі вачыма ў Бэтлееме; шчаслівым быў Сімяон, які трымаў Яго на руках; шчаслівай была Марта, якая прыняла Яго як госця ў сваім доме. «Але мы шчаслівейшыя за ўсіх іх, бо валодаем гэтым скарбам пастаянна і бесперапынна, бо можам не толькі бачыць яго, але і рэальна прымаць у сваё сэрца», — сцвердзіў іерарх.
«У гэтае прыгожае свята Божай Міласэрнасці, у вашу адпустовую ўрачыстасць, аддамо ўсе пашану гэтаму Найсвяцейшаму Сакрамэнту і будзьма карыстацца Яго ласкай не толькі сёння, але на працягу ўсяго нашага зямнога жыцця», — заахвоціў на заканчэнне гаміліі біскуп Аляксандр Яшэўскі.
