12 сакавіка ў Браславе завяршыўся дэканальны этап конкурсу на веданне Святога Пісання, які традыцыйна праводзіцца сярод дзяцей і падлеткаў у Віцебскай дыяцэзіі.
Як паведамляецца на старонцы браслаўскай парафіі Нараджэння Маці Божай Waladarka.by, з пачатку года дзеці і падлеткі гэтай супольнасці распачалі падрыхтоўку да дыяцэзіяльнага конкурсу на веданне Святога Пісання. Для паглыблення біблійных ведаў былі вызначаны Першая Кніга Самуэля са Старога Запавету, а з Новага — Пасланні апосталаў Пятра, Якуба і Юды.
З дзецьмі праводзіла падрыхтоўку сястра Ірына Папакуль, эўхарыстка якой дапамагаў Міхаіл Шульгоўскі. Кожную суботу сястра тлумачыла дзецям кнігі Святога Пісання.
Дзеці ўважліва слухалі сястру і былі вельмі зацікаўленыя гісторыямі, праз якія Бог размаўляў і працягвае размаўляць з чалавекам.
27 лютага ўдзельнікі паспяхова пераадолелі першы этап конкурсу, чым пацвердзілі свае добрыя веды, таму на наступны этап прайшлі ўсе дзевяць чалавек, якія бралі ў ім удзел.
12 сакавіка адбыўся другі этап конкурсу, у якім бралі ўдзел дзеці з Браслаўскага дэканату: з вёсак Далёкія і Плюсы, а таксама з Браслава. Членамі кокурснага журы былі сястра Лілія Дарожка, Анжаліка Пілат і Міхаіл Шугольўскі.
Усе дзеці паказалі добрыя веды, і пра падвядзенні вынікаў былі вызначаны пераможцы конкурсу. Ва ўзроставай групе да 11-і гадоў імі сталі Ангеліна Маслякова і Дар’я Якубовіч, якія падзялілі першае месца, а таксама Паліна Палякова і Кацярына Дарожка. Пераможцамі ва ўзроставай групе ад 12-і да 14-і гадоў сталі Міхаіл Жукаў, Віялета Корсак, а таксама тры асобы падзялілі трэцяе месца: Ганна Яблонская, Лізавета Цыўнэль і Андрэй Цясюль.
Дзеці з лепшымі вынікамі возьмуць удзел у трэцім этапе дыяцэзіяльнага конкурсу, які пройдзе ў Віцебску ў красавіку.
Пераможцаў і ўдзельнікаў павіншаваў браслаўскі пробашч ксёндз Станіслаў Мжыглуд SDS, узнагародзіўшы іх дыпломамі і сціплымі падарункамі.
