У нядзелю 7 студзеня, калі ў Касцёле адзначалася свята Хросту Пана, у санктуарыі Віцебскай дыяцэзіі Маці Божай Браслаўскай, Валадаркі азёраў, адбылося благаслаўленне новаўсталяванай хрысцільні.
Хрысцільня — гэта вялікае аздобленае начынне, якое, паводле старадаўняй традыцыі заходняга Касцёла, усталёўваецца ў баптыстэрыі — месцы, дзе ўдзяляецца хрост, або ў іншым прыдатным месцы ў каталіцкай святыні. У верхняй частцы хрысцільні знаходзіцца чаша, у якой захоўваецца асвячоная падчас Пасхальнай вігіліі вада для хросту.
Хрысцільня з белага каменя з залачоным вечкам, якое вянчае крыж, усталявана ў правай наве браслаўскай святыні, пры алтары Укрыжавання.
Як паведамляецца на сайце санктуарыя Маці Божай Браслаўскай Waladarka.by, абрад благаслаўлення здзейсніў пробашч парафіі ў Браславе ксёндз Станіслаў Мжыглуд SDS.
Потым, на ўспамін хросту, адбылося акрапленне вернікаў асвячонай вадой.
