У Салігорску цяпер можна спраўджваць час па сонечным гадзінніку. Ён усталяваны на тэрыторыі касцёла святога Францішка непадалёк ад брамы, каб любы жадаючы мог падысці і паглядзець на дзіўную прыладу. 29 чэрвеня адбылося благаслаўленне гадзінніка.
Як паведамляе аддзел навінаў «Электроннага Салігорска», ствараў гадзіннік і праводзіў усе разлікі пробашч парафіі а. Сабеслаў Тамала OFM разам з вернікамі.
Для стварэння гадзінніка былі выкарыстаны даволі простыя матэрыялы: сабраныя на палях камяні, якія потым адшліфоўвалі, эпаксідная смала, нержавеючая сталь. У цэнтры гадзінніка змешчаны гноман, ад якога падае цень. Гэты цень і паказвае час. А з дапамогай «зуба» (выразкі на гномане) можна вызначыць раўнадзенства, самы доўгі і самы кароткі дзень у годзе.
Нанесены лацінскі надпіс гучыць: «Гэты цень праходзіць, як наша жыццё на зямлі». Яшчэ адзін надпіс азначае: «Супакой і дабро» (дэвіз ордэну братоў меншых францішканаў). Таксама на палатне выяўлены каардынаты Салігорска, герб горада і герб ордэна францішканаў.
Каб вызначыць час, трэба, бачачы цень, спраўдзіцца з таблічкай: гарызантальная шкала азначае месяцы, вертыкальная – хвіліны, якія трэба дадаць або адняць.
Напрыклад, у ліпені трэба дадаць каля 8 хвілін.
Асаблівасць гэтага гадзінніка ў тым, што правільны час ён будзе паказваць не ва ўсіх гарадах. Выраблены ён з улікам каардынат Салігорска. Калі яго перавезці, напрыклад, у суседні Слуцк, паказваць час ён будзе няправільна.
Як адзначыў пробашч парафіі, у планах стварыць насценны і экватарыяльны гадзіннікі.
