9 лістапада папа Францішак прыняў на аўдыенцыі студэнтаў Папскага ўкраінскага калегіума св. Язафата Кунцэвіча ў Рыме з нагоды 85-годдзя заснавання гэтай структуры.
«Запрашаю вас да вывучэння сацыяльнага вучэння Каталіцкага Касцёла, каб узрастаць у разважлівасці і разуменні сацыяльнай рэчаіснасці, у якой будзеце пакліканы працаваць», — звярнуўся Пантыфік да студэнтаў.
У перыяд свайго пантыфікату папа Пій XI выкрываў атэістычныя і негуманныя ідэалогіі свайго часу, заклікаў да абароны веры, свабоды Касцёла і перавагі чалавечай годнасці, нагадаў папа Францішак. Аднак войны і гвалт раняць і сучасны свет, працягнуў Пантыфік, узгадаўшы няпростую палітычную сітуацыю ва Украіне, дзе працягваюцца ваенныя дзеянні і «застаецца моцным жаданне справядлівасці і міру, якія б забаранілі любую форму хабарніцтва, сацыяльнай ці палітычнай карупцыі, рэчаіснасці, за якую расплачваюцца заўсёды бедныя».
«Вам, семінарысты і святары Украінскай Грэка-Каталіцкай Царквы, гэтыя выклікі могуць падавацца непад’ёмнымі; давайце, аднак, памятаць словы святога апостала Яна: “Пішу вам, юнакі, бо вы перамаглі злога (...) і слова Божае жыве ў вас» (1 Ян 2, 13-14). Калі будзеце любіць і прапаведваць Божае Слова, станеце сапраўднымі пастырамі даручаных вам супольнасцяў, а Слова гэтае будзе лямпай, што асвячае вашыя сэрцы і дамы», — запэўніў Святы Айцец.
Пантыфік заклікаў украінскіх вернікаў «любіць і захоўваць свае традыцыі, пазбягаючы, аднак, фракцыйнасці», абараняць на радзіме і за мяжой «мару аб саюзе Бога з чалавецтвам» — масты, якія б мірылі неба з зямлёю і прымушалі людзей «вучыцца ўзаемнай любові і павазе, адкінуўшы зброю, войны і любую форму насілля».
Пантыфік выказаў перакананне, што выконваць гэтую місію ў духу экуменізму дапаможа Найсвяцейшая Панна Марыя, якую ўкраінскія вернікі асаблівым чынам ушаноўваюць у нацыянальным санктуарыі ў Зарваніцы і невялічкі абраз якой захоўвае сам Пантыфік, скіроўваючы да Марыі свае малітвы штодня.
