Візіт Льва XIV у Аргенціну можа стаць нагодай для пераадолення грамадскіх падзелаў і пошуку агульнага дабра, лічыць айцец Алехандра Мараль, былы генеральны настаяцель Ордэна святога Аўгустына і даўні сябар Папы.
8 лістапада Леў XIV павінен прыбыць у Аргенціну. Мясцовыя жыхары з радасцю чакаюць яго візіту. Пра гэта ў размове з журналісткай Бэнэдэтай Капэлі з «Vatican News» распавёў 71-гадовы айцец Алехандра Мараль, які цяпер жыве ў Буэнас-Айрэсе і працуе ў адной з мясцовых парафій.
Аргенціна чакае Папу
«Людзі вельмі радыя прыезду Папы, рыхтуюцца да яго малітвай, паўсюль адчуваецца радасны настрой. Тое самае адбываецца і ў аўгустынскай супольнасці», — адзначыў святар, выказаўшы надзею на сустрэчу Святога Айца з сабратамі.
Айцец Мараль расказаў, што ў Аргенціне дзейнічаюць чатыры супольнасці Ордэна святога Аўгустына, у якіх служаць 18 законнікаў. Яны знаходзяцца ў Буэнас-Айрэсе, Мендосе, Сальце і Санта-Марыі ў правінцыі Катамарка. Іх дзейнасць звязана галоўным чынам са служэннем у парафіях і школах.
Леў XIV ведае праблемы Аргенціны
Святар звярнуў увагу на важнасць візіту Папы ў кантэксце грамадскіх падзелаў у Аргенціне. Паводле яго слоў, Леў XIV добра ведае сітуацыю ў краіне і сваімі словамі можа дапамагчы знайсці шляхі да паразумення.
«Ён з’яўляецца голасам адзінства і заўсёды заклікае да дыялогу»,
— падкрэсліў айцец Мараль.
Больш чалавечнасці
Паводле місіянера, кожны візіт Папы ў тую ці іншую краіну пакідае людзям арыенцір для далейшага жыцця — ісці наперад разам з Хрыстом. Ён выказаў спадзяванне, што прыезд Льва XIV дапаможа аргенцінцам умацаваць братэрства, будаваць больш чалавечнае грамадства і клапаціцца пра агульнае дабро. «Ён дапаможа нам расці, ісці наперад разам і шукаць найлепшае для гэтай вялікай краіны — Аргенціны», — падсумаваў святар.
