Леў XIV наведаў рымскі ўніверсітэт «La Sapienza», дзе заклікаў моладзь не паддавацца дыктатуры поспеху, а навуковую супольнасць — стаць на шлях сапраўднага раззбраення і чалавечнасці.
Распачаць ад пункту сустрэчы з Хрыстом
Пантыфік вырашыў адкрыць сваё знаходжанне ў рымскай альма-матэр менавіта з універсітэцкай капліцы. Звяртаючыся з спантанным словам да прысутных, сярод якіх былі рэктар, выкладчыкі і шматлікая моладзь, Святы Айцец падкрэсліў выключна пастырскі характар свайго візіту. Для яго было важным пачаць гэты дзень у месцы, якое ён назваў пунктам сустрэчы з Хрыстом, каб падзяліцца з акадэмічнай супольнасцю радасцю веры.
Паводле слоў Папы, кожны, хто займаецца даследаваннямі і вучобай, хто шчыра шукае праўду, у выніку знаходзіць Творцу. Леў XIV адзначыў, што Бог пакінуў свой адбітак ва ўсім, што акружае чалавека: як у самой прыродзе, так і ў людзях, створаных па Яго вобразе і падабенстве.
Пантыфік назваў магчымасць знаходзіцца ў гэтым інтэлектуальным цэнтры, які лічыцца найбуйнейшым у Еўропе, сапраўдным дарам і благаслаўленнем.
Падчас сустрэчы Папа пажадаў студэнтам, каб час, праведзены ва ўніверсітэце, стаў для іх не толькі перыядам атрымання ведаў, але і глыбокім адкрыццём прыгажосці жыцця.
Святы Айцец падзякаваў за цёплы прыём і ўдзяліў усім прысутным апостальскае благаслаўленне. Пасля малітоўнага моманту ў капліцы Леў XIV працягнуў свой візіт, накіраваўшыся ў іншыя корпусы ўніверсітэта, каб бліжэй пазнаёміцца з жыццём і праблемамі сучаснай навуковай супольнасці.
Навука павінна быць рашучым «так» жыццю
Леў XIV высока ацаніў намаганні ўніверсітэта «La Sapienza» па абароне права на адукацыю для бедных, людзей з інваліднасцю і зняволеных. Асобную падзяку Папа выказаў за стварэнне гуманітарнага калідора для студэнтаў з Сектара Газа, назваўшы гэта канкрэтным учынкам хрысціянскай любові.
Духоўны стан моладзі: паміж прагненнем праўды і ціскам сучаснай сістэмы
Звяртаючыся да моладзі, Папа закрануў праблему «шантажу чаканняў», які правакуе трывогу і дэпрэсію. Паводле слоў Святога Айца, сучасная сістэма часта зводзіць асобу да лічбаў, патрабуючы празмернай канкурэнтаздольнасці. «Мы — гэта жаданне, а не алгарытм!» — падкрэсліў Леў XIV, нагадваючы студэнтам пра іх унікальную годнасць, якую немагчыма вымераць матэрыяльнымі дасягненнямі.
Аналізуючы сусветную сітуацыю, Пантыфік назваў рост ваенных выдаткаў у Еўропе і свеце «забруджваннем розуму». Ён заклікаў не блытаць сапраўдную абарону з пераўзбраеннем, якое пазбаўляе рэсурсаў сферы адукацыі і аховы здароўя.
Асаблівую насцярожанасць у Папы выклікае выкарыстанне штучнага інтэлекту ў ваеннай сферы, што вядзе да «дэ-рэспансабілізацыі» чалавечых рашэнняў і правакуе спіраль знішчэння.
Навука і экалогія: адказнасць за будучыню супольнага дома
Леў XIV звярнуў увагу на тое, што навуковыя інвестыцыі павінны стаць радыкальным «так» жыццю, а не смерці. Узгадваючы энцыкліку свайго папярэдніка Францішка «Laudato si’», ён канстатаваў, што праз дзесяць гадоў кліматычная сітуацыя не палепшылася, нягледзячы на добрыя намеры.
Папа заклікаў моладзь ператварыць сваю неспакойнасць у «прароцтва» і стаць «творцамі міру», які грунтуецца не на зброі, а на дыялогу і справядлівасці.
Напрыканцы сустрэчы Пантыфік звярнуўся да выкладчыкаў, параўнаўшы настаўніцтва з формай міласэрнасці. Ён падкрэсліў, што навучанне — гэта не толькі перадача ведаў, але і выхаванне сумлення і пачуцця справядлівасці.
Візіт у «La Sapienza», паводле спадзяванняў Папы, павінен стаць знакам новага адукацыйнага саюза паміж Касцёлам і ўніверсітэтам, які гістарычна вырас у яго лоне.
Леў XIV запэўніў акадэмічную супольнасць у сваёй малітве і ўдзяліў усім прысутным апостальскае благаслаўленне.
