29 верасня ў Касцёле будзе адзначацца 110-ы Сусветны дзень мігрантаў і бежанцаў.
Англійская рэдакцыя парталу Vatican News паведамляе, што Дыкастэрыя па служэнні інтэгральнаму развіццю чалавека абвясціла тэму 110-а Сусветнага дня мігрантаў і бежанцаў.
Тэма сёлетняга Сусветнага дня, які будзе адзначацца ў нядзелю 29 верасня, — «Бог ідзе са сваім народам».
Касцёл у дарозе
Напярэдадні гэтай даты Папа Францішак выдасць спецыяльнае пасланне
У прэс-рэлізе Дыкастэрыі гаворыцца, што гэтае пасланне будзе «звяртацца да вандроўнага вымярэння Касцёла», з «асаблівай увагай да нашых братоў і сясцёр мігрантаў», якія прадстаўляюць «сучасны абраз вандруючага Касцёла».
«Гэта шлях, які трэба прайсці сінадальным спосабам, — гаворыцца далей у паведамленни для прэсы, — пераадольваючы ўсе пагрозы і перашкоды, каб разам дасягнуць нашай сапраўднай айчыны.
Падчас гэтага падарожжа, дзе б ні знаходзіліся людзі, вельмі важна прызнаць прысутнасць Бога, які ідзе са сваім народам, запэўніваючы яго ў сваім кіраўніцтве і абароне на кожным кроку. Аднак не менш важна прызнаць прысутнасць Пана, Эмануэля, Бога з намі, у кожным мігранце, які стукаецца ў дзверы нашых сэрцаў і дае магчымасць для сустрэчы», — сказана ў прэс-рэлізе Дыкастэрыі.
110 гадоў Сусветнаму дню мігрантаў і бежанцаў
Штогод у апошнюю нядзелю верасня адзначаецца Сусветны дзень мігрантаў і бежанцаў.
Упершыню адзначаны ў 1914 годзе, гэты Сусветны дзень з’яўляецца для католікаў нагодаю ўспомніць і памаліцца за тых, хто быў вымушаны перасяліцца з-за канфліктаў, пераследу і эканамічных цяжкасцяў.
У сувязі з гэтай падзеяй Дыкастэрыя па спрыянні інтэгральнаму развіццю чалавека правядзе інфармацыйную кампанію, скіраваную на больш глыбокае разуменне сёлетняй тэмы з дапамогаю відэа, інфармацыйных матэрыялаў і тэалагічных разважанняў.
