15 лютага прэфект Дыкастэрыі па спрыянні хрысціянскаму адзінству кардынал Курт Кох узначаліў экуменічную малітву ў памяць пра копцкіх мучанікаў, забітых тэрарыстамі ў Лівіі.
Як нагадвае Беларуская рэдакцыя парталу Vatican News, 15 лютага 2015 года тэрарысты з групоўкі «Ісламская дзяржава» выкралі 21 чалавека, якія эмігравалі ў Лівію ў пошуку працы. Сярод якіх былі 20 егіпецкіх коптаў і адзін грамадзянін Ганы. Апошні не быў хрысціянінам, але калі яго прымушалі адрачыся ад Хрыста, адказаў: «Іх Бог — мой Бог». Вернікаў жорстка забілі на ўзбярэжжы ў Сірце.
11 мая 2023 года Папа Францішак уключыў іх у Рымскі мартыралог — афіцыйны спіс святых Каталіцкага Касцёла.
Экуменічная малітва прайшла ў базіліцы святога Пятра ў дзявятую гадавіну смерці копцкіх мучанікаў. Гэта быў іх першы ўспамін у літургіі Каталіцкага Касцёла.
З гэтай нагоды ў базіліку былі прынесеныя рэліквіі дваццаці аднаго мучаніка, перададзеныя Папу Францішку Патрыярхам Копцкай Праваслаўнай Царквы Тавадрасам II. Спевы падчас набажэнства выконваў Копцкі праваслаўны хор царквы святога Юрыя ў Рыме.
Як адзначыў у гаміліі кардынал Курт Кох, мучанікі не з'яўляюцца для Касцёла «маргінальнай з’явай, але складаюць яго фундаментальны цэнтр». Ён нагадаў евангельскія словы Езуса: «Калі Мяне пераследавалі, то і вас будуць пераследаваць» (Ян 15, 20). Сведчанне мучанікаў «неаднаразова выяўлялася на працягу ўсёй гісторыі Касцёла», а таксама і ў сучасным свеце, дзе нават больш пакутнікаў, чым у часы ганенняў у першыя стагоддзі хрысціянства». Сёння 80% тых, каго пераследуюць з-за веры, з’яўляюцца хрысціянамі. «Такім чынам, у наш час хрысціянская вера з’яўляецца самай пераследаванай рэлігіяй», — адзначыў іерарх.
Па словах кардынала Коха, Езус — першы мучанік і ўзор мучаніцтва для ўсіх хрысціянаў. «Як Хрыстус цалкам падпарадкаваўся волі Айца і аддаў за нас сваё жыццё на крыжы, так і хрысціянскі мучанік не шукае пакутніцтва, але прымае непазбежнае мучаніцтва, застаючыся верным сваёй веры», — падкрэсліў кардынал Кох.
Папа Францішак «заўсёды лічыў сведчанне копцкіх праваслаўных мучанікаў вельмі важным» і ўключыў іх у Рымскі мартыралог у «знак духоўных зносін, якія аб'ядноўваюць нашы Цэрквы». Такім чынам ён жадаў паказаць, што копцкія мучанікі «з'яўляюцца сведкамі веры і ў Каталіцкім Касцёле, што яны таксама з’яўляюцца нашымі мучанікамі», — заключыў кардынал Кох.
Пасля малітвы ў ватыканскай фільматэцы прайшоў паказ дакументальнага фільма The 21: The Power of Faith — «21: Моц веры». Ён быў зняты на радзіме мучанікаў пад патранатам Тавадраса ІІ. Пасля паказу фільма адбылося абмеркаванне ўзнятых у ім пытанняў з удзелам кардынала Коха, прадстаўнікоў Копцкай Праваслаўнай Царквы і рэжысёра фільма Самуэля Армніюса.
