21 студзеня, на заканчэнне сустрэчы з вернікамі на малітве Анёл Панскі, якая прайшла ў Ватыкане, Святы Айцец абвясціў у Касцёле спецыяльны Год малітвы, які павінен дапамагчы падрыхтавацца да Юбілею 2025 года.
Як паведамляе Беларуская рэдакцыя Vatican News, Папа Францішак нагадаў, што бліжэйшыя месяцы будуць папярэднічаць урачыстаму адкрыццю Святых дзвярэй, якім у Каталіцкім Касцёле распачнецца Юбілей.
«Прашу вас умацаваць малітву, каб падрыхтавацца добра перажыць гэту падзею ласкі і спазнаць сілу надзеі ў Богу. Таму сёння мы распачынаем Год малітвы: гэта значыць год, прысвечаны таму, каб нанава адкрыць вялікую каштоўнасць і абсалютную неабходнасць малітвы: малітвы ў асабістым жыцці, у жыцці Касцёла, малітвы ў свеце»,
— сказаў Пантыфік, дадаўшы, што ў правядзенні ініцыятывы дапамогуць матэрыялы, падрыхтаваныя ватыканскай Дыкастэрыяй па евангелізацыі.
