Сёлета калядныя яслі на плошчы Святога Пятра будуць сапраўды незвычайнымі, бо Дзіцятка Езуса будзе трымаць не Марыя і не Юзаф, а святы Францішак.
Пра гэта паведаміла Беларуская рэдакцыя парталу Vatican News.
«Практычна паўторыцца тое, што адбылося 800 гадоў таму, калі Асізскі Бядняк пасля вяртання са Святой Зямлі вырашыў паставіць першыя ў гісторыі калядныя яслі», — распавёў Vatican News Энрыко Берсан, адказны за святочныя дэкарацыі на ватыканскай плошчы.
Адкрыццё батлейкі адбудзецца 9 снежня. Стваральнікі свядома даюць адсылку да таго, што адбылося ў італьянскім Грэча 25 снежня 1223 года. Яны хочуць, каб пілігрымы задумаліся над сэнсам ініцыятывы святога Францішка.
Берсан падкрэсліў, што аўтары імкнуцца як мага больш дакладна ўзнавіць тое, што адбывалася ў санктуарыі ў Грэча, дзе святы Францішак рэалізаваў сваю незвычайную інтуіцыю. Таму было вырашана стварыць тэатральныя дэкарацыі. Да гэтага прыцягнулі лепшых сусветных спецыялістаў з рымскай кінастудыі Cinecittà. План распрацаваў Франчэско Артэзэ. Фігуры былі зроблены адным з самых вядомых неапалітанскіх майстроў Антоніё Кантонэ.
«Такім чынам, гэта сапраўдны твор мастацтва. Упершыню на заднім плане будуць фрэскі і жывапіс. І ў той жа час у батлейцы спалучацца розныя італьянскія традыцыі: Неапаль, Базіліката, Рым, Венецыя… Фактычна ўся Італія, і ўсё гэта ў духу таго, што адбывалася 800 гадоў таму», — падзяліўся Энрыко Берсан.
