6 лістапада Папа Францішак сустрэўся ў ватыканскай Зале Паўла VI з хлопчыкамі і дзяўчынкамі з розных краін свету, якія прынялі ўдзел у ініцыятыве Дыкастэрыі па культуры пад назваю «Дзеці сустракаюцца з Папам».
Пра гэта паведамляе беларуская рэдакцыя парталу Vatican News.
Падчас сустрэчы Святы Айцец падкрэсліў, што дзеці могуць многаму навучыць дарослых, бо нагадваюць, наколькі прыгожым з’яўляецца жыццё ў прастаце і прабыванні разам.
Папа нагадаў, што ў Касцёле кожнае дзіця павінна адчуваць сябе як дома: прынятым з вялікай любоўю, прыгожай усмешкай, адбымкамі і пяшчотай.
Пантыфік запэўніў у жаданні прынесці абдымкі Бога і Касцёла ўсім дзецям, асабліва тым, якія пакутуюць ад вайны, голаду, хваробаў, кліматычных зменаў і беднасці.
Пастыр паўсюднага Касцёла заахвоціў дзяцей клапаціцца пра прыроду, падкрэсліўшы, што знішчаць навакольнае асяроддзе значыць знішчаць саміх сябе. Ён звярнуў увагу на шматлікія войны, якія ідуць у розных частках свету, забіраючы ў людзей спакой і жыццё, а таксама заклікаў працаваць на карысць міру.
«Мір будуецца дзякуючы працягнутай па-сяброўску руцэ і жаданню заахвоціць іншых людзей ісці разам»,
— падкрэсліў Святы Айцец.
Разам са сваімі маленькімі гасцямі Папа Францішак памаліўся за дзяцей, якія загінулі ў войнах.
