Папа Францішак прызначыў пастаяннага прадстаўніка Святога Пасаду пры аддзяленні і спецыялізаваных установах ААН у Жэневе, пры Сусветнай гандлёвай арганізацыі і пры Міжнароднай арганізацыі па міграцыі.
Як паведаміла 21 чэрвеня Беларуская рэдакцыя парталу Vatican News, італьянскі арцыбіскуп Эторэ Балестрэра змяніў на гэтай пасадзе 62-гадовага нігерыйскага арцыбіскупа Фартунатуса Нвачукву, якога Святы Айцец у сакавіку 2023 года прызначыў сакратаром Дыкастэрыі па евангелізацыі.
Балестрэра паступіў на дыпламатычную службу Святога Пасаду ў 1996 годзе. Служыў у Паўднёвай Карэі, Манголіі і Нідэрландах. З 2001 года працаваў у Дзяржаўным сакратарыяце. У жніўні 2009 года быў прызначаны падсакратаром па адносінах Святога Пасаду з дзяржавамі, змяніўшы на гэтай пасадзе П’етро Параліна, прызначанага ў той час апостальскім нунцыем у Венесуэлу.
Іерарх свабодна размаўляе па-англійску і па-французску, а таксама па-іспанску, па-нямецку і па-галандску.
