Кангрэгацыя Божага Культу і Дысцыпліны Сакрамэнтаў заклікала біскупаў улічваць сітуацыю ў асобных краінах падчас святкавання Вялікага тыдня, заўсёды клапоцячыся аб захаванні нормаў, змешчаных у літургічных кнігах.
Як паведаміла Беларуская рэдакцыя парталу Vatican News, паколькі пандэмія працягвае запавольвацца, дыкастэрыя не мае намеру даваць далейшыя рэкамендацыі па цэлебрацыі літургіі Вялікага тыдня, як гэта было ў мінулыя два гады. Яна лічыць досвед, набыты біскупскімі канферэнцыямі, дастатковым для самастойнага вырашэння рознага роду сітуацый, звязаных з пандэмічнымі абмежаваннямі. Арцыбіскуп Артур Рошэ, прэфект Кангрэгацыі, нагадвае, што гэта павінна адбывацца заўсёды з захаваннем нормаў, якія змяшчаюцца ў літургічных кнігах.
«Мы заклікаем усіх праяўляць абачлівасць і пазбягаць дзеянняў і паводзін, якія могуць прадстаўляць патэнцыяльную рызыку. Кожная ацэнка і рашэнне заўсёды павінны прымацца пасля кансультацый з канферэнцыяй біскупаў, якая павінна ўлічваць правілы, прынятыя кампетэнтнымі грамадзянскімі ўладамі адпаведных краін», — гаворыцца ў заяве.
Арцыбіскуп Рошэ нагадвае, што ў літургіі Вялікай пятніцы, падчас цэлебрацыі Мукі Пана, будуць гучаць малітвы да Бога за Касцёл і ўвесь свет.
«Разам з Украінай мы хацелі б нагадаць і пра ўсе іншыя канфлікты, якіх, на жаль, яшчэ шмат у многіх краінах свету, і якія Папа Францішак назваў фрагментарнай Трэцяй сусветнай вайной», — напісаў прэфект Кангрэгацыі Божага Культу і Дысцыпліны Сакрамэнтаў.
