У нядзелю 25 ліпеня ў Касцёле будзе адзначацца Першы Сусветны дзень дзядуляў, бабуль і пажылых людзей, тэмай якога па рашэнні Папы Францішка стануць словы Езуса з Евангелля паводле Мацвея: «Я з вамі ва ўсе дні» (Мц 28, 20).
Як адзначаецца ў заяве Дыкастэрыі па справах свецкіх, сям’і і жыцця, на якую спасылаецца беларуская рэдакцыя парталу Vatican News, гэтыя словы сведчаць пра блізкасць Хрыста і Касцёла да кожнага пажылога чалавека, асабліва ў складаныя часы пандэміі.
«Я з вамі ва ўсе дні», — гэта таксама абяцанне блізкасці і надзеі, якімі маладыя і старыя могуць дзяліцца адно з адным.
На самай справе, не толькі ўнукі і моладзь павінны прысутнічаць у жыцці пажылых людзей, але і дзядулі і бабулі маюць евангелізацыйную місію: абвяшчаць, маліцца і прыводзіць моладзь да веры.
Для адзначэння гэтага ўстаноўленага Папам Францішкам міжнароднага дня ў мясцовых Касцёлах Дыкастэрыя прапануе з сярэдзіны чэрвеня душпастырскія матэрыялы, інфармацыя пра якія будзе змешчана на яе сайце.
Аб устанаўленні Сусветнага дня дзядуляў, бабуль і пажылых людзей Папа Францішак абвясціў 31 студзеня. Пачынаючы з гэтага года, ён будзе штогод адзначацца ў 4-ю нядзелю ліпеня.
«Таксама і сёння Дух Святы абуджае ў пажылых людзях мудрыя думкі і словы: іх голас каштоўны, бо ўзносіць гімн хвалы Богу і захоўвае карані народаў. Яны нагадваюць пра тое, што старасць — гэта дар і што дзядулі і бабулі з’яўляюцца звяном паміж пакаленнямі, пакліканым перадаваць моладзі досвед жыцця і веры», — сказаў тады Папа.
Святы Айцец заўважыў, што пажылыя людзі нярэдка застаюцца ў самоце, а грамадства забываецца пра каштоўнасць захавання каранёў і іх перадачы. Ён нагадаў пра важнасць сустрэчы паміж пакаленнямі, каб дзядулі і бабулі маглі дзяліцца сваімі марамі з унукамі, а ўнукі маглі іх рэалізоўваць.
