Выдавецтва Гродзенскай дыяцэзіі прадстаўляе ўвазе чытачоў духоўна-асветніцкае выданне «Шукай міру і імкніся да яго» айца Жака Філіпа ў перакладзе на рускую мову.
«Наш век — гэта век мітусні і неспакою...» — з гэтых слоў пачынаюцца ўводзіны да кнігі. Французскі святар прыводзіць добра прыкметную тэндэнцыю ў сучасным свеце, якая назіраецца таксама ў хрысціянскім і духоўным жыцці.
«Часта мы нервуемся і турбуемся, жадаючы ўсё вырашыць самастойна, у той час як значна больш эфектыўна было б заставацца ў спакоі пад поглядам Бога і дазволіць Яму дзейнічаць у нас сваёй мудрасцю і сілай, якія бясконца перавышаюць нашу мудрасць і сілу»,
— упэўнены аўтар.
Змест кнігі складаецца з некалькіх частак, якія разглядаюць унутраны мір як шлях да святасці, а таксама прапануюць разважанні і парады наконт таго, як рэагаваць на тое, што пазбаўляе нас міру. Напрыканцы змешчаны выбраныя тэксты святых розных эпох, якія дапаўняюць узнятыя тэмы.
Кнігі святара і прапаведніка айца Жака Філіпа перакладзены на 18 моў і ўбачылі свет агульным тыражом 400 тысяч экземпляраў.
Беларускаму чытачу аўтар вядомы па раней выдадзенай кнізе «У школе Святога Духа».
