Каталіцкая евангелізацыйная супольнасць «Эхад», якая дзейнічае пры катэдральнай парафіі святога Францішка Ксавэрыя ў Гродне, атрымала афіцыйны статус у Каталіцкім Касцёле ў Беларусі.
Як паведамляе Прэс-служба Гродзенскай дыяцэзіі, біскуп Гродзенскі Аляксандр Кашкевіч пасля некалькіх сустрэч з лідэрамі супольнасці зацвердзіў і падпісаў яе статут. Дакумент уручыў лідэру супольнасці Анатолю Канарскаму на нядзельнай сустрэчы «Эхад» ксёндз Алег Пятрашка, прызначаны пастаянным духоўным апекуном і касцёльным асістэнтам супольнасці.
На гэтай сустрэчы святар, які таксама атрымаў з рук біскупа Гродзенскага дэкрэт аб прызначэнні, быў афіцыйна прадстаўлены членам супольнасці і гасцям.
Каталіцкая евангелізацыйная супольнасць «Эхад» дзейнічае на працягу шасці гадоў. Першая сустрэча адбылася 4 сакавіка 2018 года.
У перакладзе са старажытнагабрэйскай мовы Эхад азначае «адзінства». Асноўны кірунак дзейнасці супольнасці «Эхад» — евангелізацыя і духоўнае развіццё яе членаў, сяброў і гасцей сустрэч, якія яна праводзіць. «Эхад» шчыльна супрацоўнічае з іншымі каталіцкімі супольнасцямі з розных гарадоў і імкнецца прыносіць духоўны плён дзеля дабра Каталіцкага Касцёла і хрысціянскага свету.
Члены «Эхад» спадзяюцца, што афіцыйнае зацвярджэнне заахвоціць іх супольнасць, а таксама іншыя касцёльныя супольнасці і рухі да яшчэ больш стараннай працы на карысць Касцёла на Беларусі ў плённым супрацоўніцтве з іерархамі Касцёла і згодна з яго вучэннем.
Знамянальна, што афіцыйнае зацвярджэнне касцёльнай уладай новай евангелізацыйнай супольнасці адбылося ў Пастырскі год, які ў мясцовым Касцёле прысвечаны тэме «Касцёльныя рухі ў евангелізацыі Беларусі».
Падрабязней пра супольнасць «Эхад» можна даведацца на яе сайце Ehad.by.
