Законніцкая супольнасць Таварыства Хрыста і Курыя Гродзенскай дыяцэзіі са смуткам паведамляюць, што 20 снежня ў Польшчы ва ўзросце 59-і гадоў адышоў у вечнасць ксёндз Рышард Чайка, хрыстусовец.
Святар быў пробашчам парафіі Беззаганнага Зачацця Найсвяцейшай Панны Марыі ў Марыянаве (Польшча), а раней служыў у Беларусі, на тэрыторыі Гродзенскай дыяцэзіі.
У 1995–1996 гг. быў вікарыем катэдральнай парафіі святога Францішка Ксавэрыя ў Гродне.
У 1996–1997 гг. служыў у парафіі святых Пятра і Паўла ў Іўі.
З верасня 1997 да чэрвеня 2007 г. быў пробашчам парафіі святога Мікалая, біскупа, у Геранёнах (Івейскі дэканат).
Служачы ў Геранёнах, вельмі шмат зрабіў для мясцовых вернікаў, а таксама ў справе аднаўлення ўнікальнай гістарычнай святыні.
Парадак пахавання
- Развітанне з ксяндзом Рышардам адбудзецца ў парафіяльным касцёле ў Марыянаве 22 снежня на святой Імшы ў 18.00 па польскім часе.
- Пахавальная цырымонія пройдзе 23 снежня ў касцёле святога Яна Хрысціцеля ў Старгардзе. У 9.30 па польскім часе адбудзецца малітва Ружанца, у 10.00 — святая Імша, потым пахаванне на Старых могілках Старгарда, дзе хаваюць памерлых хрыстусоўцаў.
