У парафіі Маці Божай Ружанцовай і святога Дамініка ў Ракаве (Мінска-Магілёўская архідыяцэзія, Валожынскі дэканат) адбылася ўрачыстасць Першай Камуніі, якую наведаў фатограф Віктар Ведзень.
Падрыхтоўку да гэтай важнай падзеі дзевяць хлопчыкаў і дзве дзяўчынкі распачалі яшчэ са сваім пробашчам, ксяндзом канонікам Дзмітрыем Барылам, які напрыканцы лютага адышоў у вечнасць на 49-м годзе жыцця.
Рыхтавала дзяцей да прыняцця сакрамэнту Эўхарыстыі сястра Юлія Бугай, дамініканка.
Ва ўрачыстасць Найсвяцейшай Тройцы яны ўпершыню прынялі Цела Хрыста з рук новага пробашча парафіі ксяндза Дзмітрыя Чупрына, прыступіўшы перад гэтым да першай споведзі.
У той самы дзень мясцовы жыхар Казімір Казіміравіч таксама ўпершыню прыступіў да сакрамэнту споведзі і прыняў Першую Камунію
Асабістую патрыхтоўкі да сакрамэнтаў правёў для мужчыны ксёндз Дзмітрый Чупрын.
На заканчэнне літургіі дзеці і бацькі падзякавалі сястры Юліі за падрыхтоўку да сакрамэнтаў, а ксяндзу Дзмітрыю — за іх удзяленне. Бацькі і дзеці таксама памаліліся за спачылага ксяндза Дзмітрыя Барылу.
