У суботу 11 лютага ў кляштары сясцёр кармэлiтак Дзiцяткі Езуса ў Адамавічах (Гродзенская дыяцэзія, Сапоцкінскі дэканат) адбыўся дзень засяроджання для дзяўчат. Тэмай сустрэчы было запрашэнне Езуса: «Калі хочаш быць шчаслівым, ідзі за Мною!»
Дзень засяроджання правёў для дзяўчат ксёндз Уладзіслаў Малышка.
Адна з удзельніц сустрэчы ў Кармэлі ў Адамавічах падзялілася сваімі ўражаннямі.
«За свае дваццаць гадоў я ўпершыню пабывала на такім дні засяроджання, які прымусіў мне шмат над чым задумацца. Калі я ехала ў Адамавічы, то не чакала ад гэтай сустрэчы нічога асаблівага, але менавіта там я атрымала адказы на многія мае пытанні і не толькі.
Па-першае, яшчэ ніколі і нідзе я не адчувала такога супакою. Мяне ўразіла асаблівая цішыня гэтага месца, дзе я змагла засяродзіцца на малітве, сваіх пытаннях, праблемах, думках. Я нават не ўяўляла, наколькі мне гэта было патрэбна! Я атрымала магчымасць пабыць у цішыні, памаліцца, пагаварыць з Богам і паслухаць Яго голас.
Па-другое, мяне заўсёды хвалявала і абражала, калі людзі навокал не разумелі мяне і гаварылі, што Бога няма. Я, у сваю чаргу, заўсёды старалася пераканаць такіх людзей сваімі доказамі і словамі, але нічога не выходзіла. Але падчас канферэнцыі я пачула неабходную для сябе думку, якая засталася ў маім сэрцы: „Навошта спрачацца са сцяной, калі яна не перасунецца? Не трэба пераконваць чалавека, калі ён не хоча слухаць. Трэба проста радавацца разам з Езусам і дзяліцца гэтай радасцю з іншымі. Толькі такім чынам я буду здольна штосьці даказаць“.
Апошняе, што мяне захапіла, гэта прыемная атмасфера, людзі і размовы. Сёстры нагадалі ўсім нам пра важнасць Святых Сакрамэнтаў і напоўнілі нас натхненнем. Я вельмі ўдзячная Богу за тое, што пазнаёміў мяне з сёстрамі кармэліткамі, якія з адкрытым сэрцам і радасцю прынялі нас. Я ўпэўнена, што гэты дзень і гэтая сустрэча застанецца ў маім сэрцы назаўсёды», — кажа ўдзельніца
