5 красавіка студэнты Беларускага дзяржаўнага ўніверсітэта наведалі касцёл Маці Божай Будслаўскай у Мінску.
Візіт студэнтаў вядучай ВНУ краіны ў маладую каталіцкую парафію стаў адным з мерапрыемстваў, якія праводзяцца ўніверсітэтам у межах маштабнага праекту «Дыялог культур і рэлігій», скіраванага на духоўна-маральнае выхаванне моладзі, нацыянальнае яднанне, пазнанне культурна-рэлігійнай спадчыны Беларусі.
Праект быў распачаты ў 2021 годзе. З таго часу студэнты, выкладчыкі і прадстаўнікі адміністрацыі белдзяржуніверсітэта рэгулярна наведваюць святыні і дамы малітвы вядучых канфесій у Рэспубліцы Беларусь. Неаднаразова яны станавіліся гасцямі каталіцкіх парафій. Не першы раз госці наведваюць і касцёл Маці Божай Будслаўскай у Мінску.
За час рэалізацыі праекту яго ўдзельнікі даведаліся пра гісторыю Касцёла ў Беларусі, узнікненне санктуарыя ў Будславе і святкаванне Будслаўскага фэсту, уключанага ў 2018 годзе ў спіс нематэрыяльнай спадчыны чалавецтва ЮНЕСКА.
У сваю чаргу прадстаўнікі Касцёла па запрашэнні кіраўніцтва БДУ сталі пастаяннымі гасцямі вядучай ВНУ краіны. Каталіцкае духавенства брала ўдзел у набажэнстве з нагоды святкавання 100-гадовага юбілею ўніверсітэта, наведвала універсітэцкую бібліятэку, музей гісторыі БДУ, удзельнічала ў канферэнцыях і пасяджэннях круглых сталоў.
Прадметам духоўнай размовы са студэнтамі гэтым разам стала традыцыя Вялікага посту. Акрамя таго, былі абмеркаваны перспектывы далейшага супрацоўніцтва Беларускага дзяржаўнага ўніверсітэта і канфесій у Рэспубліцы Беларусь.
