З 1 па 3 красакавіка ў парафіі Нараджэння Маці Божай у Браславе прайшлі велікапосныя рэкалекцыі, якія правёў ксёндз Андрэй Шут, пробашч парафіі святога Антонія ў Рагачове, экзарцыст Пінскай дыяцэзіі.
Як паведамляе сайт Санктуарыя Маці Божай Валадаркі Азёраў у Браславе Waladarka.by, рэкалекцыяніст прысвяціў свае пропаведзі тэме спакусаў, прапанаваўшы «паглядзець на іх як на дар Божы».
Святар нагадаў пра тое, якім чынам д’ябал спакушаў Езуса ў пустыні, і адзначыў, што падобным чынам злы дух падыходзіць да ўсіх людзей праз спакусы цела, вачэй і пыхі.
«Але Бог дапускае выпрабаванні дзеля таго, каб чалавек праявіў сваё дабро і веру, каб умацоўваўся ў сваіх цнотах», — падкрэсліў ксёндз экзарцыст.
Святар нагадаў, што падмуркам веры з’яўляецца першая Божая запаведзь, і што той, хто па-сапраўднаму шануе Бога, імкнецца паступаць так, як Ён кажа.
«Мы маем патрэбу ў сапраўднай ежы: Божыя загады, любоў да Бога. Тады нічога нам не пашкодзіць.
Выпрабаванні скончацца, але з Богам мы застанемся, і будзем шчаслівыя, што вытрымалі», — сцвердзіў ксёндз Андрэй Шут падчас рэкалекцый у браслаўскай парафіі.
