18 сакавіка Старшыня Канферэнцыі Каталіцкіх Біскупаў у Беларусі біскуп Віцебскі Алег Буткевіч адзначае 50-годдзе з дня нараджэння. Дырэктар парталу Catholic.by ксёндз доктар Аляксандр Улас віншуе кіраўніка епіскапату з юбілеем.
Ад імя супрацоўнікаў і ўсіх чытачоў парталу Канферэнцыі Каталіцкіх Біскупаў у Беларусі Catholic.by жадаю павіншаваць шаноўнага біскупа Алега Буткевіча з юбілеем 50-годдзя з дня нараджэння і выказаць сардэчныя пажаданні ў гэты асаблівы дзень.
У дэкрэце Другога Ватыканскага Сабору Christus Dominus пра пастырскае служэнне біскупаў у Касцёле ёсць такія знамянальныя словы: «Самі біскупы, прызначаныя Духам Святым, займаюць месца Апосталаў як пастыры душ і разам з Найвышэйшым Пантыфікам і пад яго ўладай маюць місію ўвекавечваць справу Хрыста, вечнага Пастыра. Сапраўды, Хрыстус дае Апосталам і іх пераемнікам наказ і ўладу навучаць усе народы, асвячаць людзей у праўдзе і пасвіць іх. Таму біскупы ласкай Духа Святога, які ім быў дадзены, сталі сапраўднымі і аўтэнтычнымі настаўнікамі веры, першасвятарамі і пастырамі» (пар. ChD 2).
Таму жадаю Вам, Ваша Эксцэленцыя, каб Вы заўсёды былі мужным настаўнікам веры, мудрым абаронцам супольнасці Божага народа і руплівым святаром у выкананні ўскладзенай на Вас місіі асвячэння нашага Касцёла на Беларусі.
Няхай блізкасць у дачыненні да самотных і адкінутых, міласэрнасць да грэшных, спачуванне да церпячых і адначасова праўда супраць падману, справядлівасць супраць зла і любоў супраць эгаізму свету суправаджаюць Вас ў здзяйсненні шматлікіх адказных заданняў той місіі, якая ўскладзена на Вас Святым Духам.
Ваша Эксцэленцыя, мы разам з вернікамі нашага Касцёла даручаем усё Вашае жыццё і служэнне Апякунцы Беларусі Маці Божай Будслаўскай і просім для Вас Божага благаслаўлення ў служэнні Богу і Касцёлу ad plurimos annos — на доўгія гады!
