26 лютага ў Мінску прайшоў круглы стол «Міжканфесійная згода як важнейшы фактар умацавання грамадскага спакою і стабільнасці», прысвечаны Году народнага адзінства.
Форум праводзіўся па ініцыятыве Следчага камітэту і Інстытуту павышэння кваліфікацыі і перападрыхтоўкі.
Каталіцкі Касцёл у Беларусі на сустрэчы прадставілі прэс-сакратар Канферэнцыі Каталіцкіх Біскупаў у Беларусі ксёндз канонік Юрый Санько і дырэктар нацыянальнага Caritas ксёндз Віталій Дабраловіч.
Як паведамляе агенцтва БЕЛТА, у працы круглага стала ўзялі ўдзел прадстаўнікі рэлігій і канфесій, дзяржаўных органаў, навуковых і адукацыйных установаў, грамадскіх аб'яднанняў, члены Савету Рэспублікі і дэпутаты Палаты прадстаўнікоў.
Старшыня Следчага камітэту Іван Наскевіч падчас сустрэчы выказаў думку, што «ўсе чакалі гэтага мерапрыемства, хацелі выгаварыцца, выказаць свае ідэі для таго, каб унесці свой пасільны ўнёсак у міжканфесійную згоду».
Першы намеснік старшыні Следчага камітэту Алег Шандаровіч, словы якога прыводзіць партал newgrodno.by, адзначыў, што гэта першы ў рэспубліцы падобны форум, які праводзіцца пад эгідай Следчага камітэту.
«У нас атрымалася сабраць такое вялікае кола ўдзельнікаў, прадстаўнікоў усіх канфесій, дзяржорганаў і арганізацый, якія ў тым ліку займаюцца праблемамі алкагалізму, рэсацыялізацыі раней асуджаных асобаў, дэструкцыйнага ўплыву на моладзь.
Следчыя штодзень сутыкаюцца з наступствамі гэтых праблем і разумеюць неабходнасць пошуку новых сродкаў і метадаў дапамогі грамадзянам. Думаю, калі мы аб'яднаем і скаардынуем нашыя намаганні, то павялічым наш супольны вынік», — падкрэсліў Алег Шандаровіч.
Першы намеснік старшыні Следчага камітэту таксама адзначыў, што грамадства і ўзаемаадносіны ў ім развіваюцца імкліва, а духоўнае развіццё адстае ад навукова-тэхнічнага прагрэсу, таму варта шукаць шляхі да аднаўлення гэтага балансу.
Па выніках працы круглага стала ўдзельнікамі была прынята рэзалюцыя, у якой былі вызначаны агульныя мэты і задачы рэлігійных канфесій, дзяржаўных органаў, навуковых і адукацыйных устаноў, грамадсткіх аб’яднанняў.
