Доктар біблійнай тэалогіі і пробашч парафіі Найсвяцейшай Тройцы ў Друі (Віцебская дыяцэзія) ксёндз Сяргей Сурыновіч прапануе разважанні на перыяд Вялікага посту для больш глыбокага і плённага перажывання часу падрыхтоўкі да велікодных святаў. Тэксты будуць публікавацца кожны дзень акрамя нядзеляў.
Папяльцовая серада
Кожны год у Папяльцовую сераду распачынаецца Вялікі пост. Гэты перыяд не толькі нагадвае нам пра муку, смерць і ўваскрасенне Хрыста, але і спрыяе нашай падрыхтоўцы да глыбокага і плённага перажывання перадвелікоднага часу.
Пад плённым перажываннем маецца на ўвазе ўсведамленне найвялікшай ласкі і дару ад Бога, прапанаваных Ім для нашага навяртання, духоўнага ўзрастання і святасці.
Гэты час вызначаны Божым Провідам для таго, каб мы яшчэ раз маглі глыбока ўсвядоміць: ахвяра Збаўцы адбываецца і рэалізуецца ў кожную хвіліну нашага жыцця — Хрыстус у гэты момант таксама церпіць і памірае за адкупленне свету і кожнага з нас асабіста.
У сённяшнім Евангеллі, якое з’яўляецца часткаю Хрыстовага нагорнага казання, гучыць заклік нас міласціны, малітвы і посту, а таксама акрэсліваецца іх глыбінны сэнс і характар.
Малітва
Малітва, рэгулярная і засяроджаная на еднасці з Богам, — першы і галоўны абавязак верніка.
У сённяшнім Евангеллі прапануецца дасканалы ўзор малітвы — глыбокай, унутранай, шчырай і асаблівым чынам скіраванай непасрэдна да Бога. Малітва павінна займаць цэнтральнае месца ў жыцці верніка.
Малітва — гэта сувязь любові, якая стварае асабісты саюз паміж Богам і чалавекам і робіць магчымай чулую даверлівую размову, што напаўняе чалавека, які моліцца, вялікай унутранай радасцю.
Малітва — гэта фундамент і аснова хрысціянскага жыцця.
Пост
Пост — гэта не толькі абмежаванне сябе ў ежы, але і адмаўленне чалавека ад негатыўных схільнасцяў і залежнасцяў, гатоўнасць разарваць з грахом, дрэннымі звычкамі, абмежаванне ўласнага камфорту і выгодаў дзеля ўласнага ачышчэння і ўдасканальвання, што заслугоўвае сапраўднай узнагароды Айца.
Такі пост дапаможа навесці парадак у сэрцы, прынясе плён на карысць перамены чалавека да добрага, раскрые яго сэрца для Божай ласкі і любві.
Міласціна
Яна даецца не таму, што бедныя людзі маюць у ёй патрэбу. Чын міласціны — далікатны і поўны клопату акт справядлівасці да бліжняга, час прысвячэння сябе бліжняму, чын любові і сардэчнасці.
Служэнне бліжнім — гэта акт любові, што ўзвялічвае чалавечую каштоўнасць. Кожны добры ўчынак неабходны дзеля таго, каб у поўнай меры напоўніць нашае жыццё (пар. Тоб 12, 9) сапраўдным хрысціянствам. Ацаніць належным чынам годнасць іншага чалавека азначае ўбачыць ў ім вобраз Хрыста, вучнямі і паслядоўнікамі якога мы з’яўляемся.
«Тое, што вы зрабілі аднаму з гэтых братоў Маіх меншых, вы Мне зрабілі» (Мц 25, 40).
Перыяд Вялікага посту — напамін верніку пра абмежаванасць яго жыцця, якое з’яўляецца бесперапыннай вандроўкай да жыцця вечнага. Час посту — гэта своеасаблівыя дзверы, адчыненыя для нас у чарговы раз Божай любоўю і міласэрнасцю. Уваход у гэтыя дзверы праз малітву, пост і міласціну — яшчэ адзін шанц да нескажонага, сапраўднага жыцця ў Богу і павелічэння хрысціянскіх цнотаў.
Выкарыстаем жа яго!
