14 студзеня Ганаровы Мітрапаліт Мінска-Магілёўскі арцыбіскуп Тадэвуш Кандрусевіч развітаўся са спачылым Мітрапалітам Філарэтам.
Каталіцкі іерарх у суправаджэнні ксяндза прэлата Андрэя Стэцкевіча скіраваўся ў праваслаўны Свята-Духаў кафедральны сабор, дзе ўжо другі дзень праходзіла развітанне з Ганаровым Патрыяршым Экзархам усяе Беларусі, які адышоў у вечнасць 12 студзеня.
У галоўнай святыні братняй канфесіі, якая знаходзіцца непадалёк ад мінскага катэдральнага касцёла Найсвяцейшага Імя Марыі, арцыбіскупа Тадэвуша Кандрусевіча сустрэў айцец протаіерэй Аляксандр Шымбалёў.
У цішыні малітоўнага засяроджання арцыпастыр развітаўся з Мітрапалітам Філарэтам, якога лічыў сваім сябрам і настаўнікам.
У пятніцу 15 студзеня, калі цела спачылага Экзарха будзе пахавана ў жыровіцкім Свята-Успенскім манастыры, арцыбіскуп Тадэвуш Кандрусевіч узначаліць у Мінску цэлебрацыю святой Імшы аб вечным супакоі для святой памяці Мітрапаліта Філарэта.
