9 мая дыяканскае пасвячэнне прынялі семінарысты Віктар Рушлевіч з Вавёркі, які належыць да Ордэна рэгулярных латэранскіх канонікаў, і Ян Чупрынскі з Барысава, які належыць да супольнасці ксяндзоў марыянаў.
Як паведамляе Grodnensis.by, пасвячэнне Віктару Рушлевічу ўдзяліў у базыліцы Божага Цела ў Кракаве (Польшча) біскуп Раман Пiндэль, ардынарый Бельска-Жывецкай дыяцэзіі. У Эўхарыстыі ўдзельнічалі візітатар кс. Дарыюш Качынскі CRL, іншыя святары і госці. Пасля ўрачыстай малітвы пасвячэння і ўручэння кнігі Евангелля новы дыякан упершыню спаўняў сваё служэнне ля алтара.
Ордэн рэгулярных канонікаў засноўвае сваю духоўнасць на Рэгуле св. Аўгустына.
Ён практыкуе евангельскія цноты паслухмянасці, чыстасці і супольнага жыцця без уласнасці. Ордэн не прывязвае сваю душпастырскую дзейнасць да нейкай канкрэтнай сферы. Ён адкрыты на любую форму працы ў Касцёле. Дэвіз ордэну, у якім заключаецца ўся яго місія, — словы з Дзеяў Апосталаў: мець «адно сэрца і адзін дух», як у манаскім жыцці ў кляштарах, так і ў душпастырскім служэнні Касцёлу.
У Беларусі рэгулярныя латэранскія канонікі служаць ужо шмат гадоў на тэрыторыі Гродзенскай дыяцэзіі — у Вавёрцы, адкуль паходзіць дыякан Віктар Рушлевіч.
Зараз там служыць адзін святар, які таксама паходзіць з гэтай парафіі, — кс. Андрэй Роўба CRL.
Як паведамляе сайт марыянскай семінарыі ў Польшчы, пасвячэнне пяцярым маладым марыянам, сярод якіх быў Ян Чупрынскі, удзяліў у капліцы семінарыі дапаможны біскуп Элцкай дыяцэзіі Адрыян Гальбас SAC.
У гаміліі іерарх казаў пра прыняцце Евангелля ў сваё сэрца як жывога Слова, каб такім чынам быць больш падобнымі да Хрыста, які пасылае сваіх вучняў абвяшчаць Добрую Навіну.
