Ужо на працягу амаль тыдня святары Магілёўскага рэгіёна кожны вечар супольна моляцца аб спыненні пандэміі каранавірусу, за хворых, іх родных і за супрацоўнікаў службы аховы здароўя.
Як распавёў Catholic.by Біскупскі вікарый для горада Магілёва і Магілёўскай вобласці біскуп Аляксандр Яшэўскі SDB, духавенства рэгіёна такім чынам духоўна яднаецца паміж сабою і з тымі, каму ў гэты час асабліва патрэбная малітоўная падтрымка.
«У нас і так няшмат святароў, вялікія адлегласці паміж парафіямі, а тут яшчэ складаная эпідэміялагічная сітуацыя не спрыяе правядзенню сустрэч і супольных малітваў.
Вернікаў цяпер стала прыходзіць менш, і каб духоўна ўмацоўваць адзін аднаго ў такіх абставінах, мы, святары Магілёўшчыны, штовечар а 9-й гадзіне супольна молімся з дапамогаю канферэнц-сувязі.
У гэты складаны час вельмі важна захаваць адзінства і жывое адчуванне Касцёла як супольнасці, да чаго заахвочвае нас таксама Папа Францішак. З дапамогаю сродкаў камунікацыі мы разам молімся, абменьваемся думкамі, падтрымліваем адзін аднаго і верым, што прыйдзе дзень, калі мы зноў зможам сустрэцца — ужо „рэальна“ — і падзякаваць Богу за выбаўленне ад эпідэміі», — сказаў іерарх.
Біскуп Яшэўскі дадаў, што, магчыма, такі досвед супольнай малітвы, якім дзеляцца святары Магілёўшчыны, возьме на ўзбраенне духавенства таксама ў іншых месцах, каб разам перажыць складаны час пандэміі, спалучаны з ізаляцыяй і абмежаваннем кантактаў.
