17 верасня, у дзень літургічнага ўспаміну святога Роберта Бэлярміна, Святы Айцец Леў XIV, які перад абраннем Папам Рымскім насіў імя Роберт Фрэнсіс Прэвост, святкуе імяніны. З нагоды дня нябеснага заступніка Старшыня ККББ арцыбіскуп Юзаф Станеўскі, Мітрапаліт Мінска-Магілёўскі, кіруе Пантыфіку словы святочных віншаванняў.
Ваша Святасць, Святы Ойча!
Ад імя Канферэнцыі Каталіцкіх Біскупаў Беларусі, усяго духавенства, кансэкраваных асобаў і вернікаў нашай краіны, а таксама ад сябе асабіста сардэчна віншую Вас з днём Вашага нябеснага заступніка — святога Роберта Бэлярміна.
У гэтыя радасныя вераснёвыя дні, калі Вы адзначаеце таксама свой 71-ы дзень нараджэння, мы дзякуем Богу за дар Вашага жыцця і першасвятарскага служэння.
Божы Провід дзіўным чынам з'яднаў Вашу асобу з Вашым вялікім нябесным заступнікам. Як і святы Роберт, выдатны езуіт і Доктар Касцёла, які сумяшчаў манаскае пакліканне з захапленнем прыродазнаўчымі навукамі і астраноміяй, Вы ўнеслі ў Апостальскую Сталіцу глыбокі досвед манаскага жыцця ў Ордэне аўгустынаў, а таксама жыццёвую мудрасць, памножаную вывучэннем матэматыкі і кананічнага права.
Няхай прыклад святога Роберта Бэлярміна — мудрага настаўніка, абаронцы праўды і нястомнага працаўніка на карысць адзінства і распаўсюджання вучэння Касцёла — заўсёды будзе для Вас крыніцай натхнення ў кіраванні Чаўном Пятровым у сучасным свеце.
Жадаем Вам моцнага здароўя, духоўнай моцы, невычэрпнай радасці ў Пану і шчодрых дароў Духа Святога. Давяраем Вашае служэнне заступніцтву Найсвяцейшай Панны Марыі, Маці Касцёла, а таксама святога Роберта Бэлярміна. Просім іх, каб яны заўсёды апекаваліся Вамі і ўмацоўвалі Вас у Вашым ахвярным служэнні на карысць Каталіцкага Касцёла і ўсяго чалавецтва.
З глыбокай павагай і сыноўняй адданасцю,
Старшыня Канферэнцыі Каталіцкіх Біскупаў Беларусі
