20 лістапада ў Мінску адзначылі 30-годдзе свайго служэння ў Беларусі ксяндзы хрыстусоўцы.
Святкаванне, прымеркаванае да патранальнай урачыстасці гэтай законніцкай супольнасці — Езуса Хрыста, Валадар сусвету, — адбывалася ў маладой парафіі святога Яна Евангеліста і святога Максімільяна Кольбэ, што знаходзіцца ў сталічным мікрараёне Кунцаўшчына. Ужо восем гадоў душпастырскае служэнне тут нясуць ксяндзы хрыстусоўцы.
Як паведамляецца на парафіяльным сайце Jan.by, у капліцы цэлебрацыю ўрачыстай святой Імшы, удзельнікі якой дзякавалі Богу за 90 гадоў існавання законніцкай супольнасці хрыстусоўцаў і 30 гадоў іх служэння у Беларусі, узначаліў Генеральны вікарый Мінска-Магілёўскай архідыяцэзіі біскуп Юрый Касабуцкі.
За тры дзесяцігоддзі ў нашай краіне ў розны час працавалі 18 святароў з гэтай кангрэгацыі.
Яны неслі душпастырскае служэнне ў Брэсце, Ганцавічах, Геранёнах, Гродне, Іўі, Ішкалдзі, Лунінцы, Мінску, Мядзведзічах, Паланэчцы, Пінску і Суботніках. Парафія ў Мядзведзічах, што ў Пінскай дыяцэзіі, у 1992 годзе стала першым месцам душпастырскай працы хрыстусоўцаў у Беларусі. Цяпер у Беларусі служаць тры святары з гэтай законніцкай супольнасці: ксёндз Алег Шпець SChr, ксёндз Уладзімір Марушэўскі SChr і ксёндз Андрэй Лысы SChr; усе яны — душпастыры ў Мінску. Двое іншых святароў з Беларусі нясуць служэнне за мяжой: ксёндз Вадзім Ус SChr — у Дубліне (Ірландыя), а ксёндз Сяргей Ангур SChr — у Лас-Вегасе (Злучаныя Штаты Амерыкі).
Сама назва «хрыстусоўцы» ўказвае на Таго, хто з’яўляецца найважнейшым у працы святароў гэтай супольнасці. Біскуп Касабуцкі заўважыў, што на працягу 30-і гадоў хрыстусоўцы адзначыліся рознабаковым служэннем, а таксама падзякаваў за тое, што і сёння гэтыя святары гатовыя брацца за розныя справы і ахвярна нясуць сваё служэнне, нягледзячы на ўсе перашкоды і цяжкасці.
Пастыр нагадаў словы Езуса Хрыста: «па пладах пазнаеце іх», дадаўшы, што пладоў гэтых нямала. За восем гадоў працы ў Мінску ў Кунцаўшчыне не толькі распачалося будаўніцтва касцёла, але пастаянна будуецца і расце парафія — жывы Касцёл.
Гэта было відаць падчас урачыстасці, у якой актыўна ўдзельнічалі розныя супольнасці: прыгожа граў і спяваў хор Effata, свае функцыі выконвала літургічная служба алтара і каталіцкія скаўты. У працэсіі з дарамі ішлі сем’і Суполак Маці Божай і Асацыяцыі Святой Сям’і з Назарэта, удзельніцы малітоўнага руху «Маці ў малітве», удзельнікі школы святога Яна Паўла ІІ, Душпастырства моладзі Хрыста «Адзіныя сэрцам» і «Эўхарыстычнага руху маладых».
На заканчэнне святой Імшы святары хрыстусоўцы аднавілі свае законніцкія абяцанні, а парафіяне шчыра падзякавалі ім за ахвярнае служэнне на нашай зямлі, пасля чаго ўсе прысутныя разам праспявалі гімн кангрэгацыі.
