Кардынал Тагле — новы кіраўнік Сaritas Internationalis |
15.05.2015 15:26 |
Арцыбіскуп Манілы кардынал Луіс Антоніо Тагле быў абраны новым кіраўніком Сaritas Internationalis. Гэта адбылося вечарам 14 мая ў рамках Генеральнай асамблеі таварыства. З 2007 г. пасаду кіраўніка аб’яднання займаў гандураскі кардынал Оскар Радрыгес Марадзьяга. Кардынал Тагле з’яўляецца адным з самых маладых кардыналаў: яму 57 гадоў. Арцыбіскупам Манілы яго прызначыў Бэнэдыкт XVI 13 кастрычніка 2011 г., а амаль праз год, 24 лістапада 2012 г., уручыў яму кардынальскі берэт. Атрымаўшы навіну аб сваім абранні на пасаду новага кіраўніка найбуйнейшага каталіцкага дабрачыннага таварыства, кардынал Тагле па тэлефоне звязаўся з удзельнікамі Генеральнай асамблеі і падзякаваў за аказаны яму давер. Сустрэча прадстаўнікоў Сaritas Internationalis з усяго свету праходзіць у Рыме 12-17 мая. У ёй прымаюць удзел дэлегаты з больш чым 160 краін. Галоўнымі тэмамі форума з’яўляюцца змены клімату і пашырэнне сацыяльнай няроўнасці ў свеце. Удзельнікі спрабуюць вызначыць стратэгію для спынення гэтых негатыўных з’яў. Генеральная асамблея праводзіцца раз у чатыры гады. У склад Caritas Internationalis уваходзяць 154 нацыянальныя каталіцкія дабрачынныя арганізацыі, якія дзейнічаюць у 198 краінах і рэгіёнах свету. Мэта асацыяцыі — практычная рэалізацыя сацыяльнага служэння, гуманітарнай дапамогі і чалавечага развіцця. Паводле беларускай рэдакцыі Ватыканскага радыё, (AYU)
|