Канадскія англікане традыцыяналісцкага кірунку прагаласавалі за аб’яднанне з Каталіцкім Касцёлам у адпаведнасці з апостальскай канстытуцыяй «Anglicanorum Coetibus».

Як адзначыў былы старшыня Папскай рады спрыяння хрысціянскаму адзінству кардынал Вальтэр Каспер, поўнае адзінства Заходняй і Усходняй Еўропы немагчыма без дыялога з Праваслаўнымі Цэрквамі. Гэтае меркаванне іерарх выказаў падчас асамблеі Сусветнай лютэранскай Федэрацыі, якая праходзіла ў Штутгарце (Германія) з 20 па 27 ліпеня 2010 г.

Як паведамляе Прэс-служба Апостальскай Сталіцы, арцыбіскуп Антоніо Меніні, які да гэтага часу з’яўляўся прадстаўніком Святога Айца ў Расійскай Федэрацыі, прызначаны Апостальскім Нунцыем у гэтай краіне.

Пяць хрысціянскіх арганізацый Францыі — французскі дабрачынны каталіцкі фонд «Карытас», экуменічная служба ўзаемнай дапамогі Cimade, арганізацыя les Amis de Sabeel-France, якая падтрымлівае хрысціянскі рух вызвалення палесцінцаў, французскі аддзел акцыі хрысціян па адмене катаванняў Acat-France і пратэстанцкая місіянерская служба Défap — выступілі з заклікам да ўраду краіны спыніць «беспакаранасць Дзяржавы Ізраіль», калі яе дзеянні парушаюць міжнароднае права.

Салезіяне распачынаюць у Індыі здзяйсненне плану BASE (Bosco Academy for Skills & Employment — Акадэмія навук і працы). Такім чынам святары жадаюць забяспечыць падрыхтоўку па спецыяльнасцях для больш чым 2 мільёнаў маладых людзей з вясковай мясцовасці.

У Вялікабрытаніі працягваецца падрыхтоўка да візіту ў гэтую краіну Святога Айца Бэнэдыкта XVI, які адбудзецца з 16 па 19 верасня 2010 г. Прадстаўнікі англійскага ўраду маюць надзею, што гэты візіт адкрые вялікія магчымасці для ўладаў і некаталіцкай большасці краіны для супрацоўніцтва з Касцёлам — у тым ліку ў справах абароны чалавечай роўнасці, клімату, прыроднага асяроддзя.

28 ліпеня 2010 г. завяршыўся дзевяцідзённы пастырскі візіт ва Украіну Патрыярха Маскоўскага і ўсяе Русі Кірыла. За гэты час Патрыярх наведаў Адэскую і Днепрапятроўскую епархіі. У заключны дзень візіту праваслаўнага іерарха ў запарожскім Свята-Пакроўскім саборы ў 17.00 падчас набажэнства адбыўся выбух. Патрыярх у гэты дзень знаходзіўся ў Кіеве.

У свеце штогод паміраюць 11 мільёнаў дзяцей ва ўзросце менш 5 гадоў і больш за 500 тысяч цяжарных жанчын. Еўрасаюз і Афрыканскі Саюз паставілі перад сабой мэту да 2015 г. паменшыць гэтую лічбу на адну трэць.

Ізраільскае Міністэрства культуры дазволіла праводзіць цырымонію хросту ў рацэ Ярдан. Якасць вады ў рацэ названа прымальнай. З прычыны таго, што хрост у рацэ прымаў з рук св. Яна Хрысціцеля Езус Хрыстус, многія хрысціяне і сёння імкнуцца прыняць гэты сакрамэнт менавіта тут.

Каталіцкі Касцёл у Індыі падтрымлівае пазіцыю ўладаў, якія выступаюць супраць таго, каб стрымаць дэмаграфічны рост у краіне. У 2050 г. колькасць жыхароў Індыі можа перавысіць колькасць жыхароў Кітая, аднак сёння працу ў краіне бывае цяжка атрымаць людзям, якія маюць больш чым 2 дзяцей.

Усё больш англійскіх пар жадаюць вянчацца ў храмах пасля больш чым 10 гадоў паніжэння цікавасці да гэтага. Пасля таго, як у 2009 г. Царква Англіі распачала кампанію пад назвай «Праект вянчанняў», колькасць царкоўных шлюбаў павялічылася ва ўсіх епархіях краіны, дзе стартаваў праект.

У межах свайго візіту ва Украіну Патрыярх Маскоўскі і ўсяе Русі Кірыл падчас сустрэчы з духавенствам Днепрапятроўска заклікаў святароў адказна падыходзіць да місіянерскай працы сярод моладзі і імкнуцца знаходзіць агульную мову са сваёй маладой паствай.

У снежні 2010 г. Каталіцкі Касцёл у Аргенціне распачне працэс кананізацыі двух святароў, забітых падчас ваеннай дыктатуры 1976–1983 гг. — кс. Карласа дэ Дзьёса Мурыяса і кс. Габрыэля Лонгвіля. Затым просьба аб кананізацыі будзе накіравана ў Апостальскую Сталіцу.

Група японскіх католікаў з прэфектуры Ямагуці наведала будыйскі манастыр, дзе ў ХІХ ст. ратаваліся ад пераследу многія хрысціяне. Калі хрысціянскія вернікі збіраліся ў пакоі манастыра на малітву, будыйскія манахі стараліся гучней пець сутры, каб хрысціян не пачулі з вуліцы.

Дзякуючы спецыяльнай камп’ютэрнай праграме вучоныя з Інстытута тэалогіі ў Масачусэтсе (ЗША) здолелі расшыфраваць вымерлую мову, якую ўжывалі апошнія жыхары Ханаана ў часы Старога Запавету. Угарыцкая мова належыць да семіцкай групы і знікла ў ХІІ ст. да н.э.