20 лістапада перад урачыстай літургіяй на ватыканскай плошчы Папа Францішак зачыніў Святыя Дзверы ў базыліцы св. Пятра на заканчэнне Надзвычайнага Святога Года Міласэрнасці. У Каталіцкім Касцёле Юбілейны Год распачаўся 8 снежня 2015 г., ва ўрачыстасць Беззаганнага Зачацця Найсвяцейшай Панны Марыі.

Яго дэвізам былі словы, узятыя з Евангелля паводле Лукі: «Міласэрныя, як і Айцец». Лагатып юбілею ўяўляў сабой выяву Хрыста, які нясе на сваіх плячах знясіленага чалавека.

У гэты час у Рыме прабывала, паводле ацэнак афіцыйнага інтэрнэт-рэсурсу падзеі, каардынатарам якой была Папская рада па новай евангелізацыі, больш за 20 млн пілігрымаў з усяго свету, якія прайшлі праз Брамы Міласэрнасці ў ватыканскай і іншых рымскіх базыліках.

Святыя Дзверы ватыканская базыліка св. Пятра атрымала ў дар ад швейцарскіх католікаў як выраз падзякі Богу за выратаванне іх краіны ад зверстваў і катастроф Другой сусветнай вайны. Яны былі ўсталяваны да юбілею 1950 года.

Паводле беларускай рэдакцыі Ватыканскага радыё