Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Сталі вядомыя дэталі візіту Пантыфіка ў Швецыю
Святы Айцец
24.10.2016 16:21

Застаецца некалькі дзён да пачатку двухдзённага Апостальскага падарожжа Папы Францішка ў Швецыю. Яно будзе праходзіць з 31 кастрычніка па 1 лістапада.

Гэта будзе 26-я краіна, якую наведае Папа Францішак, і 17-е падарожжа за межы Італіі. Пілігрымка стане вынікам дыялогу паміж Папскай радай спрыяння хрысціянскаму адзінству і Сусветнай лютэранскай федэрацыяй.

Візіт Святога Айца будзе прымеркаваны да 500-годдзя Рэфармацыі. Узгадаць гэту дату было вырашана ў Швецыі, бо менавіта тут, у горадзе Лунд, у 1947 г. была заснавана Сусветная лютэранская фэдэрацыя — структура, якая каардынуе дзейнасць розных Лютэранскіх Цэркваў у 78 краінах свету.

Пасля сустрэчы з прэм’ер-міністрам Швецыі ў аэрапорце горада Мальмё Пантыфік наведае каралеўскую сям’ю. Улічваючы кароткі тэрмін падарожжа, некаторыя «пратакольныя» мерапрыемствы былі выключаны з яго праграмы.

Напрыклад, падчас сустрэчы з сям’ёй манархаў не будзе цырымоніі абмену падарункамі. Падарунак Пантыфіка — выдадзеная з нагоды Юбілейнага Года Міласэрнасці гравюра — была адпраўлена па пошце ў каралеўскі палац.

Праграма візіту мае тры галоўныя пункты: Папа паўдзельнічае ў экуменічнай малітве ў лютэранскім катэдральным саборы ў Лундзе, прыме ўдзел у экуменічным мерапрыемстве на тэрыторыі спартыўнага комплекса ў Мальмё, узначаліць святую Імшу ў мясцовым каталіцкім касцёле. Адпаведна прадугледжаны тры прамовы Пантыфіка: яны прагучаць на іспанскай мове з перакладам на англійскую і шведскую.

Адлегласць паміж Лундам і Мальмё складае каля 30 км. Папа пераадолее іх на аўтобусе разам са старшынёй Сусветнай лютэранскай федэрацыі і іншымі членамі афіцыйных дэлегацый Цэркваў. Для перамяшчэння па Мальмё Святы Айцец будзе карыстацца электрамабілем.

Паводле беларускай рэдакцыі Ватыканскага радыё (IL)

 

Пры выкарыстанні матэрыялаў сайта спасылка на Catholic.By абавязкова.