21 верасня, у Сусветны дзень распаўсюджвання інфармацыі пра хваробу Альцгеймера, на заканчэнне аўдыенцыі Святы Айцец Францішак заклікаў агарнуць любоўю і клопатам людзей з такой хваробай і апекавацца імі.
«Сёння адзначаецца XXIII Сусветны дзень распаўсюджвання інфармацыі пра хваробу Альцгеймера, тэма якога — “Памятай пра мяне”. Заахвочваю ўсіх прысутных памятаць з клапатлівасцю Марыі і чуласцю Езуса Міласэрнага пра тых, хто церпіць з прычыны гэтай хваробы, і пра іх сем’і, каб яны адчулі нашу блізкасць. Молімся таксама за асобаў, якія знаходзяцца побач з хворымі і здольныя разумець іх патрэбы, нават самыя незаўважныя, бо бачаць іх вачыма, поўнымі любові», — адзначыў Пантыфік.
Хвароба Альцгеймера — захворванне, пры якім пэўныя сістэмы клетак мозгу (нейронаў) нібы адміраюць, што вядзе да развіцця старэчай або сенільнай дэменцыі. Хвароба Альцгеймера з’яўляецца найбольш частай прычынай дэменцыі, якая развіваецца ў пажылым узросце. Першыя сімптомы могуць з’явіцца ўжо пасля 40 гадоў, а пасля 70 гадоў частата захворвання дасягае 30%.