Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Папа Францішак заклікаў да канкрэтных дзеянняў на карысць міру
Святы Айцец
21.09.2016 10:31

Вызнаўцы рэлігій не могуць заставацца абыякавымі да прагнення міру, якога жадае змучанае канфліктамі чалавецтва, адзначыў Святы Айцец падчас заключнай цырымоніі Сусветнага дня малітвы за мір, якая прайшла вечарам 20 верасня на плошчы перад базылікай св. Францішка ў Асізі.

Падчас цырымоніі выступілі Патрыярх Канстанцінопальскі Барталамей І, прадстаўнікі іўдаізму, будызму і ісламу, а таксама бежанка з Сірыі.

Звяртаючыся да прысутных, Папа Францішак заўважыў, што Бог патрабуе ад вызнаўцаў рэлігій перамагчы самую вялікую хваробу нашага часу: абыякавасць — вірус, які паралізуе, робіць інэртнымі і неадчувальнымі, закранае рэлігіі і становіцца новай формай ідалапаклонства.

Папа нагадаў, што ў многіх краінах людзі «пакутуюць ад войнаў, часта забытых, але якія з’яўляюцца прычынай болю і беднасці». «Яны добра ведаюць, лепш за моцных, што няма ніякай будучыні ў вайне», — дадаў Пантыфік.

Па словах Папы, мір, аб якім просяць у Асізі, — гэта не проста пратэст супраць вайны і тым больш не «вынік перамоваў, палітычных кампрамісаў ці эканамічных саступак»: ён паходзіць ад Бога і з’яўляецца плёнам малітвы. Мір не можа ўзнікнуць там, дзе пануе «пустыня пыхлівасці і прыватных інтарэсаў», дзе прыбытку дабіваюцца любым коштам, у тым ліку праз гандаль зброяй, падкрэсліў Святы Айцец.

«Сёння мы маліліся не адзін супраць аднаго, як часам і на жаль здаралася ў гісторыі. Без сінкрэтызму і рэлятывізму мы маліліся адзін побач з адным, адзін за аднаго», — адзначыў Святы Айцец і нагадаў, што адрозненні паміж рэлігіямі не павінны станавіцца прычынамі канфліктаў, палемікі або халоднага адчужэння.

Папа заклікаў да канкрэтнай дзейнасці на карысць міру, а не «віртуальнага падыходу тых, хто асуджае ўсё і ўсіх за клавіятурай камп’ютара, не адкрываючы вачэй на патрэбы братоў і не пэцкаючы рук дзеля тых, хто знаходзіцца ў патрэбе». Шлях рэлігій, па словах Папы, — гэта наданне прыярытэту пакутуючым; прыняцце на сябе канфліктаў і лячэнне іх знутры.

На заканчэнне ўдзельнікі Сусветнага дня малітвы за мір ушанавалі хвілінай маўчанння ўсіх ахвяр войнаў і тэрарызму.

Паводле беларускай рэдакцыі Ватыканскага радыё
(VGr)

 

Пры выкарыстанні матэрыялаў сайта спасылка на Catholic.By абавязкова.