1 мая Папа Францішак павіншаваў вернікаў, якія прытрымліваюцца юліянскага календара, з найважнейшай хрысціянскай урачыстасцю – Пасхай Хрыстовай.

«Мае сардэчныя думкі звяртаюцца да нашых братоў з Усходніх Цэркваў, якія святкуюць сёння Вялікдзень. Уваскрослы Пан няхай прынясе ўсім дары свайго святла і свайго спакою. Christos Anesti!» - сказаў Пантыфік падчас сустрэчы з вернікамі на плошчы св. Пятра на малітве «Regina Caeli».

Таксама ў паведамленні Святога Айца на яго канале ў «Twitter» гучыць велікоднае віншаванне: «Я звяртаюся з сардэчным прывітаннем да вернікаў Усходніх Цэркваў, якія святкуюць Святую Пасху сёння. Χριστὸς ἀνέστη!»

Сёлета даты Вялікадня па грыгарыянскім і юліянскім календарах адрозніваюцца больш, чым на месяц.

Паводле беларускай рэдакцыі Ватыканскага радыё

(AG)