Папа Францішак адправіўся ў Афрыку |
Святы Айцец
|
25.11.2015 18:03 |
25 лістапада Папа Францішак адправіўся ў сваё першае падарожжа ў Афрыку. У 8.01 па рымскім часе авіялайнер А330 («Giotto») авіякампаніі «Alitalia» з Пантыфікам на борце вылецеў з аэрапорта «Ф’юмічына» і каля 17.00 па мясцовым часе прызямліўся ў аэрапорце «Джомо Кеньята» ў Найробі (Кенія).
Самалёт праляцеў 5 389 кіламетраў праз Грэцыю, Егіпет, Судан і Эфіопію.
Сённяшні Пантыфік стане чацвёртым Папам сучаснасці, які наведаў Афрыку.
Непасрэдна перад тым, як адправіцца ў аэрапорт, Святы Айцец сустрэўся каля сваёй ватыканскай рэзідэнцыі з жанчынамі, якія з'яўляюцца ахвярамі насілля ў сям’і і гандлю людзьмі, і іх дзецьмі. Гэта італьянкі, нігерыйкі, румынкі і ўкраінкі, якімі займаюцца каталіцкія дабрачынныя арганізацыі ў італьянскім рэгіёне Лацыё.
Візіт Святога Айца ў Афрыку працягнецца да 30 лістапада. Пантыфік наведае Кенію, Уганду і Цэнтральнаафрыканскую Рэспубліку. Гэта будзе адзінаццатае Апостальскае падарожжа Папы Францішка.
Паводле беларускай рэдакцыі Ватыканскага радыё (AG)
|