Святы Айцец: прымаць шляхі збаўлення без нараканняў |
Святы Айцец |
25.03.2015 13:59 |
Вялікі тыдзень павінен дапамагчы хрысціянам прыняць Божую падтрымку без крытыкі і пярэчанняў. Пра гэта Папа Францішак казаў 24 сакавіка падчас ранішняй Эўхарыстыі ў Ватыкане. «Духоўныя капрызы» перад Богам, які тысячамі розных спосабаў прапануе збаўленне, былі ў цэнтры ўвагі Папы. Пантыфік заўважыў, што часта, будучы няздольнымі прыняць «Божы стыль», мы засмучаемся і скочваемся да нараканняў. Гэта памылка, якую сёння, па словах Папы, здзяйсняюць шматлікія хрысціяне. Яна, аднак, не новая: Біблія апавядае, што так чыніў і выбраны народ, збаўлены ад рабства. Папа Францішак пачаў сваю гамілію з разважання над літургічным урыўкам з Кнігі Лічбаў, у якім гаворка ішла пра нараканні габрэяў перад абліччам цяжкасцяў, якія тыя сустрэлі ў пустыні, уцякаючы з Егіпта. Яны гублялі цярплівасць і пачыналі казаць супраць Бога, а многія з іх памерлі ад ядавітых змей. Выратаваннем ад атруты была толькі заступніцкая малітва Майсея, а таксама медны змей, узняты на жэрдзі, для тых, хто на яго глядзеў, — знак крыжа, на якім будзе ўзняты Езус. «Таксама і сярод нас, хрысціян, ёсць вялікая колькасць крыху атручаных гэтай незадаволенасцю жыццём», — заўважыў Папа. Святы Айцец звярнуў увагу на вернікаў, якія заўсёды ставяць Богу свае ўмовы, наракаюць і не жадаюць прымаць Яго шляхоў, часта кажуць: «Бог добры, але...», «Хачу быць збаўленым, але так, як мне хочацца...» «Такая жыццёвая пазіцыя атручвае сэрцы, — сказаў Святы Айцец, — таму што непрыняцце дару, які Бог чыніць згодна са сваім стылем, з’яўляецца сапраўднай атрутай». Езус адкупіў ад гэтага граху праз узыходжанне на Галготу, адзначыў Папа і дадаў, што толькі сузіранне Яго ахвяры можа вярнуць здаровую веру. «Энтузіязм, які быў на пачатку шляху з Езусам і саступіў месца незадаволенасці, лечыцца толькі ўгляданнем у Крыж, угляданнем у Бога, які ўзяў на сябе нашы грахі», — падкрэсліў Папа Францішак. На заканчэнне гаміліі Папа заклікаў вернікаў прасіць Бога аб ласцы прыняцця цяжкіх сітуацый, прыняцця Яго стылю збаўлення, «нікчэмнай ежы», на якую наракалі габрэі ў пустыні, шляхоў, якімі Бог дапамагае ісці наперад. «Няхай гэты Вялікі тыдзень, які пачнецца ў нядзелю, дапаможа нам выйсці са спакусы быцця хрысціянамі, якія пастаянна кажуць «але», — пажадаў Святы Айцец. Паводле беларускай рэдакцыі Ватыканскага радыё, (AYU) |