Бэнэдыкт XVI з’яўляецца адным з найвялікшых тэолагаў, якія знаходзіліся на Пасадзе святога Пятра. У гэтым сэнсе яго можна параўнаць толькі з Львом Вялікім і Бэнэдыктам XIV, сказаў прэфект Кангрэгацыі Веравучэння кардынал Герхард Людвіг Мюлер падчас цырымоніі адзначэння 10-й гадавіны абрання кардынала Ёзафа Ратцынгера Папам, якая прайшла 18 красавіка ў Ватыкане. Сама ж гадавіна адзначаецца 19 красавіка.

Кардынал Герхард Людвіг Мюлер падкрэсліў, што яркім сведчаннем гэтага пантыфікату быў тэалагічны талент Папы, які з’яўляецца сапраўдным харызматам, што будуе Касцёл.

Спрачаючыся з антытэалагічнымі тэндэнцыямі ў сучасным каталіцызме, кардынал Мюлер падкрэсліў, што тэалагічныя веды не служаць задавальненню інтэлектуальных імкненняў, выхваленню свайго інтэлекту або самазадавальненню ў вузкіх колах спецыялістаў. Тэалогія неабходная Касцёлу; без яе ён не можа спаўняць сваёй місіі, сказаў прэфект Кангрэгацыі Веравучэння.

Паводле беларускай рэдакцыі Ватыканскага радыё

(AG)